„ნაციონალური მოძრაობის“ ქუთაისის ორგანიზაციის წევრები ყოფილ თანაგუნდელებს პოლიტიკურ თაღლითობაში ადანაშაულებენ.
როგორც საკრებულოს დეპუტატები აცხადებენ, პარტიის ყოფილი თავმჯდომარის, ნიკა მელიას თანაგუნდელებს ფრაქცია “ნაციონალური მოძრაობა" ამ დრომდე არ დაუტოვებიათ და მეტიც, პარტიის მოქმედ დეპუტატებს ფრაქციიდან რიცხავენ.
ოპოზიციონერი დეპუტატის გიგა შუშანიას განცხადებით, მელიას გუნდის წევრები, ვერ ახერხებენ ფრაქციისთვის სახელის შეცვლას, რისთვისაც ფრაქციის წევრების გარიცხვა სჭირდებათ.
შუშანიას თქმით, ყოფილი თანაგუნდელები კანონს არღვევენ და ამ დრომდე ხელფასებს იმ ფრაქციიდან იღებენ, რომელი პარტიის წევრებიც აღარ არიან.
„ვულოცავ ნიკა მელიას, დღეს გაერთიანდა „ქართულ ოცნებასთან“ ქუთაისის საკრებულოში. დარეჯან ფხაკაძემ, რომელმაც ფრაქცია დატოვა და “ქართულ ოცნებას“ შეუერთდა დღემდე ფრაქციაში რჩება. მისი ხმით აპირებენ ჩვენს გარიცხვას ფრაქციიდან, რომლებიც წლებია ამ პარტიაში და ფრაქციაში ვართ. ეს არის პოლიტიკური თაღლითობა, პირადი სარგებლის მიღების მიზნით. მიუხედავად იმისა, რომ ისინი უკვე რამდენიმე კვირაა პარტიიდან წასულები არიან, ფრაქციიდან ხელფასს ამ დრომდე იღებენ. მოვუწოდებთ პარტიიდან წასულებს დატოვონ მანდატები!“ - განაცხადა გიგა შუშანიამ.
