„ივანიშვილის რეჟიმის ხელში „ვარდების რევოლუციის" მონაპოვარი საფრთხეშია, ჩვენ უნდა დავრჩეთ ამ იდეის ერთგულები, რათა საბოლოოდ მოვიპოვოთ საკუთარი ადგილი თავისუფალ სამყაროში", - განაცხადა დღეს, 23 ნოემბერს „ევროპული საქართველოს" თავმჯდომარე გიგა ბოკერიამ.
შეგახსენებთ: 2003 წლის 23 ნოემბერს, საქართველოში „ვარდების რევოლუცია" მოხდა და ქვეყანაში ედუარდ შევარდნაძის 11-წლიანი მმართველობა დასრულდა. „ვარდების რევოლუციის" მე-18 წლისთავს ცოცხალი ჯაჭვით აღინიშნავენ.
„ვარდების რევოლუცია" დამოუკიდებლობის გამოცხადების, საბჭოთა კავშირის დანგრევის, ამ უბედნიერესი დღის შემდეგ ყველაზე მნიშვნელოვანი დღე იყო საქართველოს უახლეს ისტორიაში. მოვლენა, რა დროსაც ქართულმა საზოგადოებამ შეძლო დიდი ნაბიჯის გადადგმა პოსტსაბჭოთა ჭაობიდან თავისუფლებისკენ, საკუთარი ბუნებრივი ადგილისკენ თავისუფალ სამყაროში, ნორმალური ქვეყნის მშენებლობისკენ, მაგრამ რომელმაც ბოლომდე ვერ გაგვიყვანა თავისუფლების სამშვიდობოს.
ამ ყველა მონაპოვარს დღეს ივანიშვილის რეჟიმის წყალობით დიდი საფრთხე ემუქრება. ჩვენ გვჭირდება ამ დღის გახსენებისას და ზოგადად, მობილიზება საზოგადოების იმ ნაწილის, ვისაც სჯერა ამ ქვეყნის თავისუფლებისა და მომავლის, რათა ბოლომდე მივიყვანოთ ის საქმე, რაც „ვარდების რევოლუციამ" დაიწყო. არ უნდა დავუშვათ, რომ ამ იდეის, ქვეყნის თავისუფლების იდეის მტრებმა ჩვენც ჩაგვითრიონ ამ მორევში დაპირისპირებისას, არ გადავუხვიოთ იმ იდეალებს, რის გამოც მოხდა „ვარდების რევოლუცია," - განაცხადა ბოკერიამ.
