„ქართულ ოცნებას“ და ბიძინა ივანიშვილს არანაირი ინტერესი არ აქვს საქართველოს ეკონომიკური მდგომარეობის გაუმჯობესებისა და განვითარების, მათ მხოლოდ უნდათ ძალაუფლების შენარჩუნება, რუსული კანონი კი ზუსტად ამის სიმბოლოა, - ამის შესახებ „ერთიანი ნაციონალური მოძრაობის“ საგარეო მიმართულების მდივნის მოადგილემ, ალექსანდრე კრევო-ასათიანმა განაცხადა, რომელიც „უცხოური გავლენის გამჭვირვალობის შესახებ" კანონპროექტს გამოეხმაურა.
მისი განცხადებით, მმართველი პარტიის მიზანი ძალაუფლების შენარჩუნებაა და არა იმ პრობლემების მოგვარება, რომელიც საზოგადოებას აწუხებს.
„ყველაზე სამწუხარო, რუსული კანონის რეინიცირებით „ქართული ოცნების“ მხრიდან არის ის, რომ ქვეყანას უწევს პოლარიზებულ სიტუაციაზე საუბარი, როდესაც სხვა უამრავი პრობლემა აწუხებს საქართველოს მოსახლეობას. დღეს ჩვენ ვცხოვრობთ უამრავი, სხვადასხვა, ეკონომიკური კრიზისის ფონზე, გვაქვს ინფლაცია, უმუშევრობა. იმის ნაცვლად, რომ ვიმუშაოთ ყველამ ერთად, რათა დავძლიოთ ეს კრიზისი, გვიწევს უამრავ სულელურ კანონზე კამათი.
ეს კიდევ ერთხელ ადასტურებს იმას, რომ „ქართულ ოცნებას“ და ბიძინა ივანიშვილს არანაირი ინტერესი არ აქვს საქართველოს ეკონომიკური მდგომარეობის გაუმჯობესებისა და განვითარების, მათ მხოლოდ უნდათ ძალაუფლების შენარჩუნება, ეს კანონი კი არის ზუსტად ამის სიმბოლო“, - განაცხადა ალექსანდრე კრევო-ასათიანმა, რომლის კომენტარს „ნაციონალური მოძრაობა“ ავრცელებს.
