საქართველოში რუსული კანონი არ გავა და ვერ გავა, რადგან ეს არის რუსეთისკენ გზა, ეს არ არის ევროპისკენ გზა, საქართველოში ვერ გავა დაშინება, საქართველოში ვერ გავა სასამართლო თუ პოლიტიკური ტერორი, - ამის შესახებ „ლელოს“ ერთ-ერთმა ლიდერმა მამუკა ხაზარაძემ განაცხადა.
როგორც ის აღნიშნავს, ლაზარე გრიგორიადისის მიმართ პოლიტიკური განაჩენი ერთი წლის წინ, მმართველი გუნდის მხრიდან უკვე გამოტანილი იყო.
„დღეს ჩვენ მოვისმინეთ სასამართლო გადაწყვეტილება, სადაც ლაზარეს 9 წელი მიუსაჯეს. აქვე მინდა გითხრათ, რომ სანამ სასამართლო გაიმართებოდა, ჩვენ ეს განაჩენი ერთი წლით ადრე მოვისმინეთ, როცა ყოფილმა პრემიერ-მინისტრმა და „ქართულმა ოცნებამ“ პრაქტიკულად ამ ადამიანს პოლიტიკური განაჩენი მიუსაჯა და მხოლოდ ამის შემდეგ მოხდა მისი გასამართლება იმ სასამართლოს და იმ მოსამართლეების მხრიდან, რომლებიც კორუმპირებულები, პოლიტიკურად მართვადი და დამორჩილებული არიან „ქართული ოცნების“ და ბიძინა ივანიშვილის მხრიდან.
ამიტომ, ველოდებით პრეზიდენტისგან ლაზარეს შეწყალებას, რადგან ლაზარეს დაშინებით ხელისუფლებას უნდა, რომ ახალგაზრდობა დააშინოს, მაგრამ ეს არ გამოვა. მათ ვერ გააჩერებს ვერაფერი, მათ თავისუფლებას ვერ შეზღუდვას და ვერ შეაშინებს ეს გადაწყვეტილება, რომელიც დღეს სასამართლომ მიიღო.
საქართველოში რუსული კანონი არ გავა და ვერ გავა, რადგან ეს არის რუსეთისკენ გზა, ეს არ არის ევროპისკენ გზა, საქართველოში ვერ გავა დაშინება, საქართველოში ვერ გავა სასამართლო თუ პოლიტიკური ტერორი, ამიტომ მე მოვუწოდებ ბიძინა ივანიშვილს, „ქართულ ოცნებას“, თქვენი პოლიტიკური დღეები დათვლილია. ბიძინა ივანიშვილი არჩევნების შემდეგ გაემგზავრება რუსეთში, საიდანაც ის იმართება, სადაც ფულს შოულობს, სადაც ის მენტალურად ცხოვრობს და უნდა, რომ რუსული კანონები და მართლწესრიგი შემოიტანოს ქართულ ცხოვრებაში, ეს არ გამოვა. ყველას მინდა მობილიზაციისკენ მოგიწოდოთ, განსაკუთრებით, ახალგაზრდებს, არ იქნება არანაირი დათმობა, არ შეგეშინდეთ“, - განაცხადა ხაზარაძემ.
