ხდება ხოლმე, როცა „ჟიგულის“ „რენაუტის“ საჭესა და „ფორდის“ საბურავებს უყენებენ, მაგრამ ამით მანქანა არ იცვლება და ის მაინც “ჟიგულია“ - თქვენი კანონიც არის რუსული, როგორი ნაწილებიც არ უნდა მიაყენოთ ამერიკულ FARA-დან და საფრანგეთის გამჭვირვალობის კანონიდან, - ასე მიმართა “ქართულ ოცნებას“ ფრაქცია “ნაციონალური მოძრაობის“ წევრმა დავით კირკიტაძემ.
როგორც კირკიტაძემ განაცხადა, პარლამენტში წარდგენილ “უცხოური გავლენის გამჭვირვალობის შესახებ“ კანონპროექტთან დაკავშირებით ამერიკული FARA-სა და საფრანგეთის კანონის მოშველიება არასწორია.
“ამოიღებთ FARA-ს რაღაცა ნაწილს, შემდეგ ფრანგული კანონის რაღაც ნაწილს და გსურთ, თქვენი კანონი ამერიკული და ფრანგული კანონების მსგავს კანონად წარმოგვიდგინოთ. ეს არის “ჟიგული“ - არ არის არც “მერსედესი“ და არც “ფორდი“, - განაცხადა დავით კირკიტაძემ.
პარლამენტის სხდომაზე “უცხოური გავლენის გამჭვირვალობის შესახებ“ კანონპროექტის განხილვა მეორე მოსმენით - მუხლობრივად მიმდინარეობს. ოპოზიცია განხილვის შეჩერებას და პროექტის ჩაგდებას ითხოვს.
