ევროპის ჩემპიონატზე B ჯგუფის დასკვნით შეხვედრაში ესპანეთის ნაკრებმა ალბანეთი 1:0 დაამარცხა, ჯგუფში სამივე თამაში მოიგო და ცხრა ქულით პირველ ადგილზე გავიდა.
ფაქტები
- 1990 წლის შემდეგ, მას მერე, რაც ხორვატიამ დამოუკიდებლობა მოიპოვა, იტალიასთან არ წაუგია. ამ გუნდებს შორის ევრო 2024-მდე 9 მატჩი ჩატარდა, 3 ხორვატიამ მოიგო, 6 ფრედ დასრულდა.
- მას მერე, რაც ევროპის ჩემპიონატებზე ჯგუფური ეტაპები შემოიღეს (1980), იტალიას ბოლო ტურში ჯგუფის 9 მატჩიდან ერთადერთი ჰქონდა წაგებული – 2016 წელს, ირლანდიასთან.
- ლუკა მოდრიჩისთვის ეს ევროპის ჩემპიონატებზე მე-13 მატჩია. მასზე მეტი მხოლოდ კრიშტიანო რონალდოს და პეპეს აქვთ ნათამაშები.
- მოდრიჩი ყველაზე ასაკოვანი ფეხბურთელია, რომელსაც ევროპის ჩემპიონატზე გაუტანია. ის იტალიასთან მატჩში 38 წლისა და 289 დღის იყო.
ბოლო ტურის წინ ხორვატიის ნაკრებს ერთი ქულა ჰქონდა, იტალიას – 3. შესაბამისად, ფრე არცერთი გუნდისთვის იყო მისაღები. პირველმა ტაიმმა ორივე გუნდის შეტევებში ჩაიარა, თუმცა ერთ მხარეს – დონარუმა, მეორეს ლივაკოვიჩი ყოჩაღობდა. საწყისი 45 წუთიც უგოლოდ დასრულდა.
მეორე ნახევარში თამაშის სურათი არ შეცვლილა, კარგი მომენტები ჰქონდა იტალიას, თუმცა გოლი მაინც ხორვატიამ გაიტანა. 54-ე წუთზე ლუკა მოდრიჩმა ვერ გამოიყენა პენალტი (დონარუმამ აუღო), თუმცა ზუსტად ერთ წუთში იმავე მოდრიჩმა გატანა მაინც მოახერხა და ხორვატია 1:0 დააწინაურა.
მიუხედავად იმისა, რომ ხორვატიამ ბოლომდე იბრძოლა და მერვედფინალთან ხელის ერთ გაწვდენაზე იყო, საფეხბურთო ფორტუნამ იტალია მაინც არ გაწირა – მსაჯის მიერ კომპენსირებულ მერვე წუთზე, ძაკანის ეფექტური დარტყმის შემდეგ ბურთი ლივაკოვიჩის კარში აღმოჩნდა და – 1:1.
იტალიის ნაკრები მეორე ადგილით ჯგუფიდან მაინც გავიდა. პირველი ესპანეთია.
