ევრო 2024-ის ბოლო მერვედფინალურ მატჩში თურქეთის ნაკრებმა ავსტრია დაძაბულ ბრძოლაში 2:1 დაამარცხა და მეოთხედფინალში ითამაშებს.
ფაქტები
- 1964 წლის შემდეგ თურქეთის ნაკრები პირველი გუნდი გახდა, რომელის შემადგენლობაში დიდ საფეხბურთო ტურნირზე (მსოფლიოსა და ევროპის ჩემპიონატი) 20 წლამდე ასაკის ორმა ფეხბურთელმა ითამაშა – გიულერი და ილდიზი ავსტრიასთან მატჩში 19 წლისანი იყვნენ.
- ავსტრია და თურქეთი დიდ საფეხბურთო ტურნირზე პირველად შეხვდნენ ერთმანეთს.
- ბოლოს ავსტრიის ნაკრები თურქეთს ამხანაგურ მატჩში მიმდინარე წლის მარტში შეხვდა და 6:1 მოუგო.
- ევრო 2024-ზე მეორე დუბლი თურქეთის ნაკრების მცველმა, მერიჰ დემირალმა შეასრულა.
- მერიჰ დემირალის გოლი ავსტრიის ნაკრების კარში, რომელიც 57-ე წამზე გავიდა, ევროპის ჩემპიონატების ისტორიაში მეორე ყველაზე სწრაფი გოლია. აღსანიშნავია, რომ ევროპის ჩემპიონატების ყველაზე სწრაფი გოლიც ამ ჩემპიონატზე გავიდა, რომელიც იტალიასთან მატჩში ალბანელმა ბაირამმა გაიტანა (23-ე წამი).
1 წუთი’ – თურქეთის ნაკრებმა სწრაფი გოლი გაიტანა. კუთხურიდან მოწოდებული ბურთი ავსტრიელმა მცველმა კარის ხაზიდან გამოიტანა, იქ კი ყველას მერიჰ დემირალმა დაასწრო და ანგარიში გახსნა.
60 წუთი’ – თურქეთის ნაკრებმა ანგარიში ორამდე გაზარდა – არდა გიულერმა კუთხურიდან მოაწოდა ბურთი და მერიჰ დემირალმა თავური დარტყმით დუბლი შეასრულა – 2:0.
67 წუთი’ – ავსტრიის ნაკრებმა ერთი გოლი მალე გაქვითა – გოლი კვლავ სტანდარტულ მდგომარეობას მოჰყვა – კუთხურიდან ჩაწოდების შემდეგ ბურთი მიხაელ გრეგორიტჩმა გაიტანა.
თურქეთის ნაკრები 6 ივლისს მეოთხედფინალში ნიდერლანდებს დაუპირისპირდება.
1tv.ge
