ევროკავშირის ელჩი საქართველოში, პაველ ჰერჩინსკი ამბობს, რომ საქართველოს ევროკავშირში გაწევრიანება შეჩერებულია და გაურკვეველია, იქნება თუ არა საქართველო ევროკავშირის გაფართოების შემდეგი დიდი ტალღის ნაწილი. ამის შესახებ ელჩმა ჟურნალისტებთან განაცხადა.
„რა თქმა უნდა, ევროკავშირის შემდეგი ხელმძღვანელობა დიდი ამბიციებით დაიწყებს მუშაობას. გაფართოება ევროკავშირის ერთ-ერთი მთავარი გამოწვევაა და ვიმედოვნებ, ევროკავშირის ახლად არჩეული ხელმძღვანელობის მიერ მომდევნო ხუთი წლის განმავლობაში განხორციელდება ევროკავშირის გაფართოების შემდეგი დიდი ტალღა. საქართველოს შემთხვევაში, ჯერ კიდევ გაურკვეველია, იქნება თუ არა საქართველო ევროკავშირის გაფართოების შემდეგი დიდი ტალღის ნაწილი. გულწრფელად ვიმედოვნებ, რომ ასე იქნება და ოქტომბრის არჩევნების შემდეგ, ჩვენ განვაახლებთ მუშაობას, რათა საქართველო იყოს ევროკავშირის შემდეგი დიდი გაფართოების ნაწილი, ახალჩამოყალიბებული მთავრობა, ვინც არ უნდა მოახდინოს ამ მთავრობის ფორმირება, დაიწყებს ხელახალ სერიოზულ მუშაობას ევროკავშირში გაწევრიანებისკენ”,- თქვა ელჩმა.
როგორც ელჩმა აღნიშნა, 27 ივნისს ევროკავშირის ლიდერები შეთანხმდნენ, შეეჩერებინათ ევროკავშირში საქართველოს გაწევრიანების პროცესი, რამდენადაც, მათთვის გაურკვეველია მოქმედი ხელისუფლების განზრახვა, „უცხოური გავლენის გამჭვირვალობის შესახებ“ კანონი და ანტიდასავლური რიტორიკა კი შეუთავსებელია გაწევრიანების მიზანთან.
„27 ივნისს, ევროკავშირის ლიდერებმა, პრეზიდენტებმა და პრემიერ-მინისტრებმა ბრიუსელში მიიღეს რამდენიმე მნიშვნელოვანი გადაწყვეტილება, შეათანხმეს ევროკავშირის სტრატეგიული დღის წესრიგი, მიაღწიეს შეთანხმებას ევროკავშირის მომავალ ლიდერებთან დაკავშირებით, დაადასტურეს უკრაინის დაცვის მიმართ ჩვენი მტკიცე ვალდებულება და სამწუხაროდ, ასევე შეთანხმდნენ, შეეჩერებინათ ევროკავშირში საქართველოს გაწევრიანების პროცესი. ევროკავშირის ლიდერებისთვის გაურკვეველია საქართველოს ამჟამინდელი ხელისუფლების განზრახვა. „უცხოური გავლენის გამჭვირვალობის შესახებ“ კანონი აშკარა უკუსვლაა 9 ნაბიჯთან დაკავშირებით. ასევე, ანტიდასავლური, ანტიევროპული რიტორიკა სრულად შეუთავსებელია ევროკავშირში გაწევრიანების გაცხადებულ მიზანთან“, - განაცხადა ელჩმა ჟურნალისტებთან.
მისივე თქმით, გაყინულია 30 მილიონი ევრო, რომელიც საქართველოს ევროპის მშვიდობის ფონდიდან (EPF) უნდა მიეღო.
