ვალერიან სიდამონ-ერისთავის ნამუშევრების გამოფენა იხსნება-კულტურის სამინისტრო

საქართველოს ხელოვნების სასახლეში კულტურის სამინისტროს მიერ 2021 წელს შეძენილი ვალერიან სიდამონ-ერისთავის ნამუშევრების გამოფენა იხსნება
10 თებერვალს, 17:00 საათზე საქართველოს ხელოვნების სასახლეში ვალერიან სიდამონ-ერისთავის ნახატების გამოფენა გაიხსნება. მხატვრის ნამუშევრები საქართველოს კულტურის, სპორტისა და ახალგაზრდობის სამინისტრომ პროექტის "ქართული კულტურისათვის მნიშვნელოვანი კერძო კოლექციების ერთიანობის შენარჩუნება/სამუზეუმო ფონდების შევსება" ფარგლებში შეიძინა. აღსანიშნავია, რომ 2021 წელს კულტურის ხელშეწყობის პროგრამის ფარგლებში სამინისტროს მიერ მხატვრის ოჯახისგან შეძენილი ნამუშევრების კოლექცია გადანაწილდა საქართველოს ხელოვნების სასახლესა და შალვა ამირანაშვილის სახელობის ხელოვნების მუზეუმებში. შედეგად, 425 000 ლარის ღირებულების 110 ნამუშევრით შეივსო საქართველოს ხელოვნების სასახლის კოლექცია, ხოლო 789 340 ლარის ღირებულების 406 ნამუშევრით შეივსო საქართველოს ხელოვნების მუზეუმის შესაბამისი ფონდი.
გამოფენაზე, რომელიც ერთ თვეს გაგრძელდება, მხატვრის 50 ნამუშევარი იქნება წარმოდგენილი ორივე მუზეუმიდან.
ვალერიან სიდამონ-ერისთავის (1889-1943) შემოქმედება შთამბეჭდავი და მრავალფეროვანია. იგი ქმნიდა თემატურ სურათებსა და პორტრეტებს, თეატრალურ-დეკორაციულ ნამუშევრებსა და წიგნების ილუსტრაციებს, მუშაობდა კინოს მხატვრობაზეც, წლების განმავლობაში ასწავლიდა თბილისის სამხატვრო აკადემიაში.
ვალერიან სიდამონ-ერისთავს დიდი წვლილი მიუძღვის ისტორიული ჟანრის ფერწერის განვითარებაში და ქართულ ხელოვნებაში ამ ჟანრის ერთ-ერთი დამფუძნებელია. ამასთან, იგი მიეკუთვნება ქართული თეატრის მხატვართა პირველ თაობას. 1920 წლიდან 1923 წლამდე სიდამონ-ერისთავი ქართული თეატრის ერთადერთი პროფესიონალი მხატვარი იყო. მუშაობდა ისეთ რეჟისორებთან, როგორებიც იყვნენ კოტე მარჯანიშვილი, სანდრო ახმეტელი, მიხეილ ქორელი, აკაკი ფაღავა, ალექსანდრე წუწუნავა. გაფორმებული აქვს 70-ზე მეტი თეატრალური თუ საოპერო წარმოდგენა და 40-ზე მეტი ფილმი, მათ შორის სპექტაკლები: "ბერდო ზმანია", "ღალატი", "ავგაროზი"; ფილმები: "პეპო", "სურამის ციხე", "ხანუმა", "ჩემი ბებია", "კრაზანა"; საოპერო დადგმები: "თქმულება შოთა რუსთაველზე", "ლოენგრინი", ბოშათა ბარონი", "დაისი".