კოალიცია „ერთიანობა - ნაციონალური მოძრაობის“ განცხადებით, „ვისოლ ჯგუფში” შემავალმა სარეკლამო კომპანიამ [ „ალმა +“ ] ბანერების განთავსებასთან დაკავშირებით, უარი ბანერების შინაარსის გამო განაცხადა.
როგორც კოალიციის მიერ გავრცელებულ განცხადებაშია ნათქვამი, კომპანიასთან კოალიციამ ყველა ხელშეკრულებით გათვალისწინებული ვალდებულება შეასრულა, თუმცა სარეკლამო კომპანიამ, ბანერების განთავსებასთან დაკავშირებით უარი შინაარსის გამო განაცხადა, რაც მათი თქმით, კომპანიის მხრიდან დისკრიმინაციულია.
“ვისოლ ჯგუფში” შემავალ “ალმა პლუსთან, რომელიც გარე რეკლამის ბაზრის მონოპოლისტია, რამდენიმე კვირის წინ გაფორმდა საარჩევნო ბანერების განთავსების ხელშეკრულება და კონტრაქტის ყველა პირობა, მათ შორის, ფინანსური ნაწილი სრულყოფილად შესრულდა.
„დღეს მათგან მივიღეთ პასუხი, რომ არ განათავსებენ ბანერებს მასზე არსებული წარწერების გამო. ეს არის დისკრიმინაციული მიდგომა ჩვენი პარტიის მიმართ და ჩარევა როგორც ჩვენი, ასევე ქართველი ხალხის გზავნილში - მოიშორონ ბიძინა ივანიშვილი და “ქართული ოცნება”.
შეგახსენებთ, რომ “ალმა+” არის კომპანია, რომელსაც პრობლემა არ ჰქონია, რუსი ოლიგარქის საამებლად, ჩვენი მეგობარი ქვეყნის, უკრაინის დაბომბილი ქალაქები და ტრაგედია დაეტანა თავისივე ბანერებზე და მწვანე შუქი აენთო ივანიშვილის ზნედაცემული კამპანიისთვის. ასევე, ეს არის კომპანია, რომლის დამფუძნებელი, სოსო ფხაკაძე, ჩვენი ქვეყნისთვის ყველა კრიტიკულ მომენტში იჭერდა “ქართული ოცნების” მხარეს, მათ შორის, რუსულ კანონთან დაკავშირებითაც.
26 ოქტომბერს, ჩვენ უნდა ავირჩიოთ ევროპული მომავალი, რომელშიც, პოლიტიკური ნიშნით დევნასა და ბიზნესის სახელისუფლებო ინსტრუმენტად ქცევას ერთხელ და სამუდამოდ დაესმება წერტილი,“ - წერია განცხადებაში.
