უკრაინის საელჩოში ერთიანობის დღესთან დაკავშირებით გამართულ ღონისძიებას საქართველოს საგარეო საქმეთა მინისტრი, დავით ზალკალიანიც ესწრებოდა. მან უკრაინისადმი მხარდაჭერა გამოხატა.
ზალკალიანმა განაცხადა, რომ საქართველოს ახსოვს რუსული აგრესია და აღნიშნა, რომ უკრაინის საზღვრებთან რუსული ჯარების მობილიზება შემაშფოთებელია.
საგარეო მინისტრმა ასევე შემაშფოთებლად შეაფასა რუსეთის დუმის გუშინდელი გადაწყვეტილება მიემართა პუტინისთვის უკრაინის დროებით ოკუპირებული ტერიტორიების დამოუკიდებლობის აღიარების მოთხოვნით. ზალკალიანის თქმით ეს მიუღებელია და გმობს ამ ნაბიჯს.
„სამწუხაროდ, საქართველომ თავის თავზე გამოცადა 2008 წელს რუსული აგრესია, რასაც მოჰყვა საქართველოს ტერიტორიების დიდი ნაწილის ოკუპაცია და აღიარება რუსეთის ფედერაციის მხრიდან და რასაც მოჰყვა ათასობით ადამიანის საკუთარ სამშობლოში დევნილად ყოფნა. დღეს იმავე განსაცდელშია ჩვენი მოძმე უკრაინა.
შემაშფოთებელია 21-ე საუკუნეში ვუყურებდეთ იმ მასშტაბურ სამხედრო მობილიზაციას, რომელიც ხდება უკრაინის საზღვრებთან და განსაკუთრებით შემაშფოთებელი იყო რუსეთის დუმის გუშინდელი გადაწყვეტილება, მიემართა რუსეთის პრეზიდენტისთვის უკრაინის განუყოფელი ტერიტორიების აღიარებასთან დაკავშირებით.
რა თქმა უნდა, ეს არის კატეგორიულად მიუღებელი. ჩვენ ვგმობთ ამ ნაბიჯს. სამწუხაროდ, რუსეთის ფედერაციისგან კიდევ ერთხელ ვხედავთ საერთაშორისო სამართლის ფუნდამენტური პრინციპების უგულებელყოფას" - განაცხადა დავით ზალკალიანმა.
აღსანიშნავია, რომ საქართველოს ხელისუფლებლის არცერთი წარმომადგენელი მხარდაჭერის გამოსახატად უკრაინაში ამ დრომდე არ ჩასულა. საქართველოს პარლამენტმა კი იანვარში მიიღო ქართული ოცნების მიერ შედგენილი უკრაინის მხარდამჭერი რეზოლუცია, რომელშიც რუსეთი ნახსენები არაა.
დღეს, 16 თებერვალს უკრაინა ერთიანობის დღეს აღნიშნავს. პრეზიდენტმა, ვოლოდიმირ ზელენსკიმ ვიდეომიმართვა გაავრცელა. ის მოსახლეობას ერთიანობის დღეს ულოცავს.
შეგახსენებთ, რომ უკრაინის პრეზიდენტის, ვოლოდიმირ ზელენსკიმ 14 თებერვალს განაცხადა რომ, მას აწვდიან ინფორმაციას, რომ რუსეთი უკრაინაში 16 თებერვალს შეიჭრება.
გავრცელებულ ვიდეოში ზელენსკიმ უკრაინელ ხალხს მიმართა და 16 თებერვალი ქვეყანაში ერთიანობის დღედ გამოაცხადა.
