ნატო-ს მხრიდან უკრაინის მიმართ გრძელვადიანი მხარდაჭერა მიმართულია არა ომის გახანგრძლივებისკენ, არამედ იმის უზრუნველყოფად, რომ უკრაინას შეეძლოს თავის დაცვა ახლა და ნებისმიერი აგრესიის თავიდან აცილება მომავალში, - ამის შესახებ ნატო-ს გენერალურმა მდივანმა, მარკ რუტემ ბრიუსელში ნატო-ს თავდაცვის მინისტრების შეხვედრის წინ გამართულ პრესკონფერენციაზე განაცხადა.
„განვიხილავთ ნატო-ს მიერ უკრაინისადმი მხარდაჭერის გაგრძელებას და ამ საშინელი ომის დასრულების აუცილებლობას“, - აღნიშნა რუტემ.
მისი თქმით, დღეს ნატო-ს მოკავშირეები, პარტნიორები და უკრაინა მონაწილეობას მიიღებენ უკრაინის თავდაცვის საკონტაქტო ჯგუფის შეხვედრაში, რომელსაც გერმანია და გაერთიანებული სამეფო უხელმძღვანელებენ.
„შეხვედრაზე ყურადღება გამახვილდება უკრაინის მხარდაჭერის გაგრძელებაზე იმ ფონზე, როდესაც ის რუსეთის აგრესიას ებრძვის. ჩვენ სრულად ვუჭერთ მხარს პრეზიდენტ ტრამპის ძალისხმევას, რომელიც მიმართულია სამართლიანი და მდგრადი მშვიდობის დამყარებით სისხლისღვრის შესაჩერებლად“, - აღნიშნა რუტემ.
მისი თქმით, ალიანსი უსაფრთხოების კუთხით გადამწყვეტ მომენტში იმყოფება.
„ნუ დაუშვებთ შეცდომას, ნატო დღეს ძლიერია და კიდევ უფრო ძლიერები გავხდებით. ძლიერი თავდაცვა მკაფიო გზავნილს აგზავნის - არავინ არასდროს არ უნდა იფიქროს ჩვენზე თავდასხმაზე“, - აღნიშნა ნატო-ს გენერალურმა მდივანმა.
