ირანი ცეცხლის შეწყვეტის მოლაპარაკებებს არ დათანხმდება, ვიდრე ისრაელის თავდასხმის ქვეშ იმყოფება. როგორც „როიტერი“ წერს, ამის შესახებ ირანმა კატარელ და ომანელ შუამავლებს განუცხადა.
„ირანელებმა კატარელ და ომანელ შუამავლებს აცნობეს, რომ ისინი სერიოზულ მოლაპარაკებებს მხოლოდ მაშინ განაახლებენ, როცა ირანი დაასრულებს ისრაელის პრევენციულ თავდასხმებზე რეაგირებას“, – განაცხადა მაღალჩინოსანმა ანონიმურობის დაცვით.
ამავდროულად,
ირანის ჯანდაცვის სამინისტროს ინფორმაციით, ისრაელის თავდასხმების შედეგად, სულ მცირე, 224 ადამიანი დაიღუპა.
როგორც ჯანდაცვის სამინისტროში აცხადებენ, დაშავებულია 1481 ადამიანი, ხოლო დაღუპულთა და დაშავებულთა უმეტესობა სამოქალაქო პირია.
მანამდე ადამიანის უფლებათა დამცველმა ჯგუფმა განაცხადა, რომ იერიშების შედეგად, სულ მცირე, 406 ადამიანი იყო დაღუპული, ხოლო, სულ მცირე, 654 დაშავებული.
შეგახსენებთ, რომ ისრაელმა ირანზე მასიური საჰაერო იერიში 13 ივნისს მიიტანა. მას შემდეგ კი რამდენიმე ღამეა, რაც ქვეყნებს შორის საჰაერო იერიშები გრძელდება.
