აშშ-ის ცენტრალურმა სადაზვერვო სააგენტომ მოიპოვა სანდო მტკიცებულებები, რომელიც მიუთითებს, რომ ირანის ბირთვული პროგრამა ბოლო დროს განხორციელებული დარტყმების შედეგად მნიშვნელოვნად დაზიანდა, - ამის შესახებ სააგენტოს დირექტორმა, ჯონ რეტკლიფმა განაცხადა.
„ეს მოიცავს ისტორიულად სანდო წყაროდან/მეთოდით მიღებულ ახალ სადაზვერვო ინფორმაციას, რომლის თანახმადაც, ირანის რამდენიმე მნიშვნელოვანი ბირთვული ობიექტი განადგურდა და მის აღდგენას წლები დასჭირდება“, - განაცხადა რეტკლიფმა.
ამასთან, ეროვნული დაზვერვის დირექტორის, ტულსი გაბარდის განცხადებით, დაზვერვის ახალი მონაცემები ადასტურებს, რომ ირანის ბირთვული ობიექტები დარტყმების შედეგად განადგურდა.
„დაზვერვის ახალი მონაცემები ადასტურებს იმას, რაც პრეზიდენტმა არაერთხელ განაცხადა: ირანის ბირთვული ობიექტები განადგურებულია. თუ ირანელები აღდგენას გადაწყვეტენ, მათ სამივე ობიექტის (ნატანცი, ფორდოუ, ესფაჰანი) სრულად აღდგენა მოუწევთ, რასაც, სავარაუდოდ, წლები დასჭირდება“, - დაწერა გაბარდმა სოციალურ პლატფორმა X-ზე.
