საბერძნეთში კუნძულ ქიოსზე ტყის ხანძრების უნებლიედ გაჩენაში ეჭვმიტანილი ქართველი ქალი დააკავეს, - ამის შესახებ ინფორმაციას The Guardian-ი ავრცელებს.
გამოცემის ცნობით, ქართველ ქალს სიგარეტის გადაგდების შედეგად კუნძულ ქიოსზე ტყის ხანძრების ერთ-ერთი კერის შემთხვევით გაღვივებაში ედება ბრალი.
ადგილობრივი სახანძრო სამსახურის წარმომადგენლების განცხადებით, ქართველმა ქალმა, რომელიც ქიოსზე დამლაგებლად მუშაობს, სიგარეტის გადაგდების შედეგად ხანძრის გაჩენა „აღიარა“.
ლეიტენანტმა კონსტანტინე კოზანისმა გამოცემას განუცხადა, რომ ეჭვმიტანილი სამშაბათს დააკავეს და მას ბრალს დღეს წაუყენებენ.
გამოცემა წერს, რომ ინციდენტი თვითმხილველებმაც დაინახეს.
ცნობისთვის, კუნძულ ქიოსზე ტყის ხანძრებს გასული კვირის შემდეგ 400-ზე მეტი მეხანძრე ებრძვის. ხელისუფლებამ კუნძულზე საგანგებო მდგომარეობა გამოაცხადა და ათობით სოფლის ევაკუაცია განახორციელა. ტყის ხანძრებმა კუძულზე დაახლოებით 4000 ჰექტარი ფართობი გაანადგურა.
