ჩვენ არ ვიბრძვით ერთმანეთის წინააღმდეგ, ვიბრძვით იმ სისტემის წინააღმდეგ, რომელმაც დემოკრატია ჩაანაცვლა ავტოკრატიით, სადაც მოქალაქე, ადამიანი, ნაცვლად იმისა, რომ იყოს მთავარი ფასეულობა, საზრუნავი, ღირებულება, საერთოდ გააქრო დღის წესრიგიდან, - ამის შესახებ „გახარია საქართველოსთვის“ ერთ-ერთმა ლიდერმა ანა ბუჩუკურმა ორი პარტიის მიერ გამართულ ღონისძიებაზე სიტყვით გამოსვლისას განაცხადა, სადაც „გახარია საქართველოსთვის“ და „ლელო-ძლიერი საქართველოს“ თბილისის მერობის საერთო კანდიდატი დასახელდა.
როგორც ბუჩუკურმა აღნიშნა, ის, რომ ქვეყანაში ხელისუფლების ერთადერთი წყარო არის ხალხი, სწორედ ამ რწმენისა და განცდის დაბრუნება და გაღრმავება არის მნიშვნელოვანი.
„დღეს პოლიტიკურ ველზე უსამართლობისა და უთანასწორობის პირობებში გვიწევს ბრძოლა. არა მხოლოდ ბრძოლა, არამედ ცხოვრებაც გვიწევს, ფაქტობრივად, ამ უსამართლობის პირობებში. ზუსტად დღეს „გახარია საქართველოსთვის“ და „ლელო-ძლიერი საქართველო“ ვდგავართ ერთად, ვდგავართ საქართველოს მოქალაქეებისთვის. მოხარულები ვართ, რომ ჩვენს ორ პოლიტიკურ ძალას შორის არსებული შეთანხმების პირველი საწყისი, გამხსნელი ეტაპი შედგა. ჩვენ ყველანი დარწმუნებულები ვართ, რომ წარმატებით გაგრძელდება ჩვენი ეს თანამშრომლობა. ჩვენ არ ვიბრძვით ერთმანეთის წინააღმდეგ, ვიბრძვით იმ სისტემის წინააღმდეგ, რომელმაც დემოკრატია ჩაანაცვლა ავტოკრატიით, სადაც მოქალაქე, ადამიანი, ნაცვლად იმისა, რომ იყოს მთავარი ფასეულობა, საზრუნავი, ღირებულება, საერთოდ გააქრო დღის წესრიგიდან. სწორედ ამიტომ ვდგავართ ჩვენ აქ, ამიტომ გადავდგით ეს ნაბიჯი ჩვენი თანამშრომლობისკენ. საერთოდ არ აქვს მნიშვნელობა ვის რა პოლიტიკური იდეოლოგია აქვს, ვინ მემარჯვენეა, ვინ მემარცხენე, ვინ ცენტრისტი, დღეს მთავარია, ვის სჯერა სამართლიანობის და იმ ღირსების, რაც ჩვენი ქვეყნის მომავალს და თითოეულ მოქალაქეს ეკუთვნის, ეკუთვნის საქართველოს, რისთვისაც მართლაც ღირს ყველა ბრძოლა, რომელიც ზოგჯერ არის ისეთი, როგორიც დღეს არის - უთანასწორო და უსამართლო.
ამ ქვეყანაში ხელისუფლების ერთადერთი წყარო არის ხალხი. ამ რწმენის, ამ განცდის დაბრუნება და გაღრმავება არის მნიშვნელოვანი. ამისთვის ბევრი გაქვს სამუშაო, ერთობლივადაც, ცალ-ცალკეც. ჩვენი მოქალაქეების, თითოეული თქვენგანის ხმა უნდა ისმოდეს და ჟღერდეს აბსოლუტურად ყველგან, სადაც წყდება თქვენი, ჩვენი შვილების მომავლის, ზოგადად საქართველოს ბედი“,- განაცხადა ანა ბუჩუკურმა.
