ღაზა ცეცხლშია გახვეული, - ამის შესახებ ისრაელის თავდაცვის მინისტრი, ისრაელ კაცი აცხადებს. „ისრაელის თავდაცვის ძალები ტერორისტულ ინფრასტრუქტურას ურტყამს. ჩვენ უკან არ დავიხევთ, სანამ მისია არ შესრულდება“, - აცხადებს ისრაელის თავდაცვის მინისტრი.
მისი თქმით, „ჯარისკაცები გმირულად იბრძვიან, რათა „ჰამასის“ დასამარცხებლად და მძევლების გასათავისუფლებლად შესაბამისი პირობები შექმნან“.
ისრაელის თავდაცვის ძალების ცნობით, ქალაქ ღაზადან 350 000-ზე მეტი პალესტინელის ევაკუაცია განხორციელდა.
ისრაელის თავდაცვის ძალებმა ქალაქ ღაზას ოკუპაციის მიზნით სახმელეთო შეტევა დაიწყო, რომლის მიზანი, პრემიერ-მინისტრ ბენიამინ ნეთანიაჰუს მთავრობის მტკიცებით, „ჰამასის“ ამოძირკვაა, - ინფორმაციას Axios-ი ოფიციალურ პირებზე დაყრდნობით ავრცელებს.
გამოცემა წერს, რომ ისრაელის შეტევა აშშ-ის სახელმწიფო მდივნის, მარკო რუბიოს, ნეთანიაჰუსა და მისი კაბინეტის მაღალჩინოსან წევრებს შორის გამართული შეხვედრიდან რამდენიმე საათში დაიწყო.
„უნდა გვახსოვდეს, ვისთან გვაქვს საქმე - და ეს არის ადამიანების ჯგუფი, რომლებმაც თავიანთი ცხოვრება ძალადობასა და ბარბაროსობას მიუძღვნეს. როდესაც ამ მკაცრ რეალობას ვუპირისპირდებით, რამდენადაც არ უნდა გვინდოდეს, რომ არსებობდეს მისი დასრულების ერთგვარი მშვიდობიანი, დიპლომატიური გზა, ასევე უნდა ვიყოთ მზად იმ შესაძლებლობისთვის, რომ ეს არ მოხდება“, - აღნიშნა რუბიომ.
ორმა ისრაელელმა ოფიციალურმა პირმა გამოცემასთან საუბარში განაცხადა, რომ რუბიომ ნეთანიაჰუს უთხრა, რომ ტრამპის ადმინისტრაცია მხარს უჭერს სახმელეთო ოპერაციას, მაგრამ სურს მისი სწრაფად განხორციელება და რაც შეიძლება მალე დასრულება.
„რუბიომ არ შეუშალა ხელი სახმელეთო ოპერაციას“, - განაცხადა ერთ-ერთმა ისრაელელმა მაღალჩინოსანმა.
