აშშ-ის პრეზიდენტმა, დონალდ ტრამპმა კონგრესის “რესპუბლიკელ” წევრებს მოუწოდა, ხმა მისცენ ჯეფრი ეპშტეინთან დაკავშირებული ფაილების გამოქვეყნებას.
„რესპუბლიკელებმა“ წარმომადგენელთა პალატაში ხმა უნდა მისცენ ეპშტეინის ფაილების გასაჯაროებას, რადგან ჩვენ დასამალი არაფერი გვაქვს. დროა, შევეშვათ „დემოკრატების“ ამ სიცრუეს, რომელიც რადიკალმა მემარცხენე შეშლილებმა მოაწყვეს, რათა „რესპუბლიკური პარტიის“ დიდი წარმატებისგან, მათ შორის „დემოკრატების“ „შათდაუნზე“ ჩვენი ბოლოდროინდელი გამარჯვებისგან ყურადღების გადატანა შეძლონ“, - დაწერა ტრამპმა Truth Social-ზე გამოქვეყნებულ პოსტში.
მანამდე, წარმომადგენელთა პალატის სპიკერმა, მაიკ ჯონსონმა განაცხადა, რომ მისი აზრით, იუსტიციის დეპარტამენტის დოკუმენტების გამოქვეყნებაზე კენჭისყრა ეპშტეინის საქმეში ხელს შეუწყობს იმ ბრალდებების დასრულებას, რომ ტრამპს რაიმე კავშირი ჰქონდა ეპშტეინის მიერ არასრულწლოვანი გოგონების ძალადობასა და ტრეფიკინგთან.
რამდენიმე დღის წინ აშშ-ის წარმომადგენელთა პალატის ზედამხედველობის კომიტეტის „დემოკრატმა“ წევრებმა ეპშტეინის დოკუმენტები გამოაქვეყნეს, რომელიც მის მიერ ელექტრონული ფოსტით გაგზავნილ წერილებს შეიცავს. დოკუმენტების თანახმად, ჯეფრი ეპშტეინი 2019 წელს ჟურნალისტი მაიკლ ვოლფისთვის გაგზავნილ შეტყობინებაში წერს, რომ დონალდ ტრამპმა „გოგონების შესახებ იცოდა“.
ჟურნალისტების კითხვაზე, რას გულისხმობდა ეპშტეინი, როდესაც წერდა, რომ დონალდ ტრამპმა „გოგონების შესახებ იცოდა“, აშშ-ის პრეზიდენტმა უპასუხა, რომ „ამის შესახებ არაფერი იცის“.
აღნიშნული დოკუმენტების გამოაქვეყნების შემდეგ ტრამპმა აშშ-ის იუსტიციის დეპარტამენტს ეპშტეინის „დემოკრატებთან“ კავშირების გამოძიება დაავალა.
ცნობისთვის, ფინანსისტ ჯეფრი ეპშტეინს სექსუალური ტრეფიკინგის საქმეზე ბრალი 2019 წელს წაუყენეს. ოფიციალური ცნობებით, ეპშტეინი ათობით არასრულწლოვანის სექსუალურ ტრეფიკინგს ეწეოდა. ეპშტეინი ციხეში გარდაიცვალა.
