თავდაცვის ყოფილ მინისტრს, ბაჩო ახალაიას ბრალდება წარედგინა.
როგორც ადვოკატმა გია გოროზიამ ბრალის გაცნობის შემდეგ მედიას განუცხადა, ახალია ბრალს არ აღიარებს და სიგიჟეს უწოდებს.
„ბაჩოს პოზიცია გახლავთ ის, რომ ბრალდება არის სრულიად უსაფუძვლო, უარგუმენტო და აბსურდული, პირდაპირ გითხრათ, სიგიჟე. მას ბრალი წარედგინა იმისთვის, რომ მას პირადად მურთაზ ზოდელავასთან და პაატა ბურჭულაძესთან აკავშირებს ნაცნობობა და მეგობრობა - ეს არის ბრალის ფორმულირება. გავეცანით ბრალდებას და იქ რაიმე არგუმენტი, კონკრეტული გარემოებები, რაიმე მყარი მტკიცებულება, თუნდაც რაიმე სახის ინფორმაცია, რომ მას რაიმე გარკვეული ქმედებით ჩადენილი აქვს სისხლის სამართლის დანაშაული, ასეთი მოცემულობა მე ბრალში ვერ ვნახე. ის წარდგენილ ბრალდებას არ აღიარებს, ვინაიდან უწოდებს აბსურდულს და სიგიჟეს“, - თქვა მან.
ამასთან, ადვოკატი აცხადებს, რომ ბაჩო ახალაიას გამოძიებისთვის ჩვენება არ მიუცია.
"არ ენდობა გამოძიებას და ამ მოტივით მან გამოძიებას ჩვენება არ მისცა“, - აცხადებს ადვოკატი.
ჟურნალისტის კითხვაზე, ხომ არ ფიქრობთ, რომ საქმე არის პოლიტიკური ნიშნით, ადვოკატმა უპასუხა: „აი, ეგ არის ზუსტად ბრალი“.
ადვოკატმა თქვა, რომ ბრალის ფორმულირებაზე განმარტებისგან თავს იკავებს და გაიმეორა, რომ ახალიას „ბრალი წარდგენილი აქვს მურთაზ ზოდელავასთან, პაატა ბურჭულაძესთან მეგობრობისა და ნაცნობობისთვის”.
