ვენესუელაში ახალი არჩევნები მომდევნო 30 დღის განმავლობაში არ ჩატარდება, – ამის შესახებ აშშ-ის პრეზიდენტმა, დონალდ ტრამპმა „ენბისი ნიუსთან“ ინტერვიუში განაცხადა.
„ქვეყანაში ჯერ სიტუაცია უნდა გამოვასწოროთ. ახლა არჩევნების ჩატარება შეუძლებელია. ხალხი ხმის მიცემასაც ვერ შეძლებს, ამას გარკვეული დრო დასჭირდება. ჩვენ უნდა უზრუნველვყოთ ქვეყნის გამოჯანმრთელება“, – განაცხადა ტრამპმა.
ამასთან, დონალდ ტრამპმა აღნიშნა, რომ აშშ-მა, შესაძლოა, სუბსიდირება გაუწიოს ნავთობკომპანიების ძალისხმევას ქვეყნის ენერგეტიკული ინფრასტრუქტურის აღსადგენად, პროექტს, რომელსაც, მისი თქმით, შესაძლოა, 18 თვეზე ნაკლები დასჭირდეს.
„უზარმაზარი თანხების დახარჯვა იქნება საჭირო და ამას ნავთობკომპანიები გააკეთებენ, შემდეგ კი ეს დანახარჯები ჩვენ მიერ ან შემოსავლების მეშვეობით აუნაზღაურდებათ“, – აღნიშნა ტრამპმა.
აშშ-ის პრეზიდენტმა ხაზგასმით აღნიშნა, რომ აშშ ვენესუელასთან ომში არ იმყოფება.
„არა, ვენესუელას არ ვებრძვით. ჩვენ ომი გვაქვს მათთან, ვინც ნარკოტიკებს ყიდის. ჩვენ ომი გვაქვს მათთან, ვინც ნარკოდამოკიდებულებსა და ფსიქიატრიული დაწესებულებების პაციენტებს ჩვენს ქვეყანაში გზავნის“, – აღნიშნა ტრამპმა.
აშშ-ის პრეზიდენტმა განაცხადა, რომ დელსი როდრიგესი აშშ-ის ოფიციალურ პირებთან თანამშრომლობს, თუმცა ხაზგასმით აღნიშნა, რომ ნიკოლას მადუროს გადაყენებამდე მასთან კომუნიკაცია არ ჰქონიათ.
კითხვაზე, ჰქონდათ თუ არა ვენესუელაში რომელიმე ოფიციალურ პირთან რაიმე შეთანხმება ნიკოლას მადუროს გადაყენების შესახებ, ტრამპმა უპასუხა, რომ ბევრ ადამიანს სურდა შეთანხმების დადება, თუმცა ეს მადუროს უახლოესი წრის დახმარების გარეშე მოხდა.
ამასთან, ტრამპმა მიანიშნა, რომ აშშ-მა, შესაძლოა, მეორე სამხედრო ინტერვენცია წამოიწყოს ვენესუელაში, თუ როდრიგესი ამერიკელ ოფიციალურ პირებთან თანამშრომლობას შეწყვეტს, თუმცა არ თვლის, რომ ეს საჭირო გახდება.
„ენბისი ნიუსთან“ ინტერვიუში ტრამპმა აშშ-ის ოფიციალური პირების ჯგუფი დაასახელა, რომლებიც ვენესუელის მართვაში იქნებიან ჩართული, მათ შორის არიან სახელმწიფო მდივანი მარკო რუბიო, თავდაცვის მდივანი პიტ ჰეგსეტი, თეთრი სახლის ადმინისტრაციის უფროსის მოადგილე სტივენ მილერი და აშშ-ის ვიცე-პრეზიდენტი ჯეი დი ვენსი.
ჟურნალისტის კითხვაზე, საბოლოოდ ვინ იქნება ვენესუელის მართვაზე პასუხისმგებელი, ვინ უხელმძღვანელებს ქვეყანას, ტრამპმა მოკლე პასუხი გასცა: „მე“.
