ირანში ინტერნეტზე წვდომა, უკვე 60 საათზე მეტია, შეზღუდულია. გავრცელებული ცნობებით, შეზღუდვა საერთაშორისო სატელეფონო ზარებსაც ეხება.
როგორც მედია წერს, რამდენიმე პროვინციაში ადამიანებმა შეძლეს Starlink-ის სატელიტური ინტერნეტის გამოყენება, თუმცა მთავრობა მის დაბლოკვასაც ცდილობს.
მანამდე ირანის მთავრობამ დაადასტურა, რომ ქვეყანაში ინტერნეტის გათიშვა საპროტესტო აქციების ფონზე განახორციელა. ირანში აქციები 28 დეკემბერს დაიწყო. თავდაპირველად თეირანის ქუჩებში მაღაზიების გამყიდველები გავიდნენ, რათა გამოეხატათ უკმაყოფილება ირანული ვალუტის გაუფასურების გამო. შემდეგ მათ სტუდენტებიც შეუერთდნენ.
