დიდი ბრიტანეთის მთავრობამ ბრიტანელ სამხედროებს ნება დართო, დააკავონ ქვეყნის ტერიტორიულ წყლებში მყოფი რუსეთის „ჩრდილოვანი ფლოტის“ გემები, რომელთა წინააღმდეგაც სანქციებია დაწესებული.
„ბრიტანელი სამხედროები შეძლებენ, ავიდნენ „ჩრდილოვანი ფლოტის“ გემებზე, რომლებიც ტრანზიტით გადიან გაერთიანებული სამეფოს ტერიტორიულ წყლებში“, – ბრიტანეთის ნათქვამია მთავრობის ვებგვერდზე გამოქვეყნებულ განცხადებაში.
განცხადებაში ასევე აღნიშნულია, რომ ეს ნაბიჯი კიდევ ერთი დარტყმაა რუსეთის „ჩრდილოვან ფლოტზე“, რომელიც ეხმარება რუსეთს უკრაინის წინააღმდეგ ომის დაფინანსებაში.
ლონდონში ამბობენ, რომ ახალი ზომები ფაქტობრივად დახურავს ბრიტანეთის ტერიტორიულ წყლებს, მათ შორის ლა მანშის სრუტეს, სანქცირებული გემებისთვის, რაც მათ აიძულებს, გამოიყენონ უფრო გრძელი და ფინანსურად არახელსაყრელი მარშრუტები, ან დადგნენ ბრიტანელი სამხედროების მიერ დაკავების საფრთხე წინაშე.
„ჩვენ ვცხოვრობთ სულ უფრო არასტაბილურ და სახიფათო სამყაროში და ყოველდღიურად ვეჯახებით საფრთხეებს მსოფლიოს სხვადასხვა მხრიდან. პუტინი სარგებლობს ახლო აღმოსავლეთში მიმდინარე ომით, რადგან მიაჩნია, რომ ნავთობის ფასების ზრდა საშუალებას მისცემს, ჯიბეები გაივსოს. სწორედ ამიტომ ვაძლიერებთ ბრძოლას მის „ჩრდილოვან ფლოტთან“, არა მხოლოდ ბრიტანეთის უსაფრთხოების უზრუნველსაყოფად, არამედ იმისთვისაც, რომ მოვაკლოთ პუტინის სამხედრო მანქანას ის ბინძური შემოსავლები, რომლებიც უკრაინაში მის ბარბაროსულ კამპანიას აფინანსებს“, – განაცხადა ბრიტანეთის პრემიერ-მინისტრმა, კირ სტარმერმა.
