რუსეთის საგარეო დაზვერვის სამსახური (СВР) ირწმუნება, რომ კონსტანტინოპოლის პატრიარს, ბართლომეოსს საქართველოს მართლმადიდებელი ეკლესიის საკუთარი გავლენის ქვეშ მოქცევა სურს. როგორც ყოველთვის, СВР-ი ცნობას დამადასტურებელი საბუთების გარეშე ავრცელებს.
"რუსეთის ფედერაციის საგარეო დაზვერვის სამსახურის პრესსამსახური იუწყება, რომ СВР-ში შემოსული ინფორმაციის თანახმად, კონსტანტინოპოლის პატრიარქი ბართლომე დაუღალავად აგრძელებს მსოფლიო მართლმადიდებლობის გაყოფისკენ მიმართულ ვერაგულ კურსს, ხელმძღვანელობს რა პრინციპით "დაყავი და იბატონე". ამჯერად იგი ცდილობს თავისი გავლენის ქვეშ მოაქციოს საქართველოს მართლმადიდებელი ეკლესია ისარგებლოს რა სრულიად საქართველოს კათოლიკოს-პატრიარქის ილია II-ის გარდაცვალებით." - წერია განცხადებაში.
როგორც СВР-ში ირწმუნებიან, ბართლომეოსს სურს საქართველოს პატრიარქის კანდიდატად დასახელდეს პიროვნება, რომელსაც ის დაეყრდნობა. СВР-ის მტკიცებით, ეს სასულიერო პირები არიან დასავლეთ ევროპის მიტროპოლიტი აბრაამი (გარმელია) და ფოთისა და ხობის მიტროპოლიტი გრიგოლი (ბერბიჭაშვილი).
"ამ როლისთვის ბართლომე კანდიდატებად განიხილავს დასავლეთ ევროპის მიტროპოლიტ აბრაამს (გარმელიას) და ფოთისა და ხობის მიტროპოლიტ გრიგოლს (ბერბიჭაშვილს). თავის უახლოეს გარემოცვაში იგი მათ წარმოაჩენს, როგორც მის ნების ყველაზე შესაფერის შემსრულებლებს." - წერია განცხადებაში.
СВР-ი კონსტანტინოპოლის პატრიარქს ძალაუფლების სიყვარულსა და მართლმადიდებელი ეკლესიის გახლეჩვაში ადანაშაულებს.
"ბართლომე საკუთარი ქმედებებით "თანასწორთა შორის პირველობას" კვლავ ცვლის "თანასწორთა შორის ძალაუფლებაზე", მორიგი, მნივნელოვანი, ერთ-ერთი უძველესი, ქართული მართლმადიდებელი ეკლესიის შიდა საქმეებში ჩარევით. აშკარაა, რომ მან, როგორც უკრაინის, სერბეთისა და ბალტიის ქვეყნების შემთხვევებში, დაივიწყა მეორე მსოფლიო კრების მეორე წესი: "ეპისკოპოსი არ უნდა გავიდეს თავისი სამრევლო ეკლესიის ფარგლებიდან ხელდასხმისათვის"" - წერია რუსეთის საგარეო დაზვერვის სამსახურის განცხადებაში.
