„საერთაშორისო გამჭვირვალობა - საქართველო“: ქვეყანაში ამჟამად 90 პოლიტიკური პატიმარია

„საერთაშორისო გამჭვირვალობა - საქართველოს“ ადამიანის უფლებათა და მართლმსაჯულების პროგრამის მენეჯერის, სანდრო ბარამიძის განცხადებით, ორგანიზაციის შეფასებით, ამჟამად საქართველოში 90 პოლიტიკური პატიმარია.

მისი თქმით, ეს საქართველოს უახლეს ისტორიაში ერთ-ერთი ყველაზე მძიმე ვითარებაა.

„დღეს ჩვენმა ორგანიზაციამ „საერთაშორისო გამჭვირვალობა - საქართველომ“ გამოაქვეყნა საქართველოში პოლიტიკური პატიმრების სია. მათი რაოდენობა ამ დროისთვის შეადგენს 90 ადამიანს. ადრე მეტი იყო, თუმცა გარკვეულ პირებთან საპროცესო შეთანხმება გაფორმდა“, – განაცხადა ბარამიძემ.

მისივე განმარტებით, სია ეფუძნება ევროპის საბჭოს საპარლამენტო ასამბლეის მიერ განსაზღვრულ პოლიტპატიმრის კრიტერიუმებს, რომელთაგან ერთის დაკმაყოფილებაც კი საკმარისია პირის პოლიტპატიმრად მიჩნევისთვის.

ბარამიძის თქმით, ამ 90 ადამიანიდან აბსოლუტური უმრავლესობა ერთზე მეტ კრიტერიუმს აკმაყოფილებს, ხოლო ნაწილი – ხუთივეს.

„ეს კრიტერიუმებია, როდესაც დარღვეულია ადამიანის ფუნდამენტური უფლებები, მათ შორის გამოხატვის, შეკრებისა და გაერთიანების თავისუფლება; როდესაც პირი პოლიტიკური მოტივით არის დაკავებული; როდესაც სასჯელი აშკარად არაპროპორციულია; როდესაც დევნა დისკრიმინაციულია და დარღვეულია სამართლიანი სასამართლოს ელემენტარული უფლებები. ბევრი მათგანი ხუთივე კრიტერიუმს აკმაყოფილებს, მათ შორის არიან მზია ამაღლობელი, ელენე ხოშტარია და სხვები“, – აღნიშნა ბარამიძემ.

მისი შეფასებით, „ეს არის დიდი, შავი ლაქა საქართველოს ისტორიაში, როდესაც ქვეყანაში ამდენი პოლიტპატიმარი გვყავს.“

„საერთაშორისო გამჭვირვალობა - საქართველომ“ დღეს იმ პირთა სიაც გამოაქვეყნა, რომლებსაც ორგანიზაცია პოლიტიკურ პატიმრებად მიიჩნევს.