ჟურნალისტმა ვახო სანაიამ, რომელსაც პარლამენტის თავმჯდომარის, შალვა პაპუაშვილისა და დეპუტატ ვლადიმერ ბოჟაძის შესახებ სოციალურ ქსელში გამოქვეყნებული პოსტის გამო 14-დღიანი ადმინისტრაციული პატიმრობა შეეფარდა, განაცხადა, რომ საკუთარი სიტყვის თავისუფლების შეზღუდვას არ აპირებს.
„მინდა საზოგადოებას ვუთხრა, რომ არ არსებობს არანაირი გარემოება, სადაც მე ჩემს სიტყვის თავისუფლებას შევიზღუდავ. ვერ მოხდება ის, რომ გაგვაჩუმონ“, – განაცხადა სანაიამ.
მისი თქმით, მისთვის მნიშვნელობა არ აქვს, სახელმწიფოს მხრიდან ჯარიმა იქნება გამოყენებული თუ პატიმრობა.
„ვერავინ ამიკრძალავს ვთქვა ის, რაც მინდა რომ ვთქვა და გამოვხატო ისე, როგორც მე მინდა. თავად ეს სხდომები, რომელსაც მე არ ვესწრები, აბსურდულია“, – აღნიშნა ჟურნალისტმა.
სანაიას განცხადებით, მისი გზავნილი ხელისუფლების მიმართ არის, რომ ზეწოლის მიუხედავად დუმილს არ აპირებს.
„მათი გზავნილია, რომ ჩვენ გავჩუმდეთ, ჩემი გზავნილი კი ისაა, რომ არ გავჩუმდები. რა ჯარიმაც არ უნდა დაწერონ, პატიმრობა გამოიყენონ, არ გავჩუმდები. ამას ვეუბნები ივანიშვილს, მის ე.წ. მთავრობას და საზოგადოებას. მოვლენ, იციან მისამართი“, – განაცხადა ვახო სანაიამ.
შეგახსენებთ, თბილისის საქალაქო სასამართლომ ჟურნალისტ ვახო სანაიას 14-დღიანი ადმინისტრაციული პატიმრობა შეუფარდა. გადაწყვეტილება მოსამართლე ზვიად ცეკვავამ მიიღო. საქმე შსს-ის სიძულვილის ენის წინააღმდეგ ბრძოლის სამმართველოს მიმართვის საფუძველზე, პარლამენტის თავმჯდომარის შალვა პაპუაშვილისა და დეპუტატ ვლადიმერ ბოჟაძის შესახებ სოციალურ ქსელში გამოქვეყნებულ პოსტს უკავშირდება.
