პარტია „დროას“ ლიდერის, ელენე ხოშტარიას განცხადებით, ჟურნალისტ ვახო სანაიას დაკავება სიტყვის თავისუფლების წინააღმდეგ მიმართული ქმედებაა და საზოგადოების მხრიდან რეაგირების არქონა ქვეყნისთვის მძიმე შედეგების მომტანი იქნება.
ხოშტარიამ პირველ რიგში მხარდაჭერა გამოუცხადა სანაიასა და მის ოჯახს.
„პირველ რიგში, ჩემი პატივისცემა ვახო სანაიას, რომელიც გამორჩეულია საკუთარი შეუპოვრობით. სრული მხარდაჭერა მის ოჯახს“, – განაცხადა ხოშტარიამ.
მისი თქმით, დამოუკიდებელი მედიისა და ჟურნალისტების წინააღმდეგ მიმდინარე ქმედებები განსაკუთრებულ შეშფოთებას იწვევს.
„კარგად უნდა გვესმოდეს, რომ ეს შეიძლება დიქტატურის გაფორმებას ნიშნავდეს, მაგრამ ყველაზე საგანგაშო არის ის, რომ თუ ჩვენ არ გვექნება ამაზე რეაქცია, რომ ადამიანს იჭერენ სიტყვისთვის, ეს იმას ნიშნავს, რომ ჩვენ ჩვენი ხელით მონობას ვაწერთ ხელს“, – აღნიშნა მან.
ხოშტარიას შეფასებით, სიტყვის თავისუფლების შეზღუდვა მთელი საზოგადოების წინააღმდეგ არის მიმართული.
„სიტყვის შეზღუდვა არის ადამიანისა და საზოგადოების მკვლელობა. საგანგაშო იქნება, თუ ჩვენ ამას შევეგუებით“, – განაცხადა „დროას“ ლიდერმა.
მისივე თქმით, საზოგადოებამ უნდა აჩვენოს ხელისუფლებას, რომ სიტყვის თავისუფლების დათმობას არ აპირებს.
„ძალიან კარგად უნდა დავფიქრდეთ და ვიმოქმედოთ იმისთვის, რომ ვანახოთ – სიტყვის დათმობას ჩვენ არ ვაპირებთ“, – განაცხადა ელენე ხოშტარიამ.
შეგახსენებთ, თბილისის საქალაქო სასამართლომ ჟურნალისტ ვახო სანაიას პარლამენტის თავმჯდომარის შალვა პაპუაშვილისა და დეპუტატ ვლადიმერ ბოჟაძის შესახებ სოციალურ ქსელში გამოქვეყნებული პოსტის გამო 14-დღიანი ადმინისტრაციული პატიმრობა შეუფარდა. მოგვიანებით სანაია საკუთარ საცხოვრებელ სახლთან დააკავეს.
