ამის შესახებ გვარამიამ საკონსტიტუციო სასამართლოს სხდომაზე განაცხადა, სადაც ხუთი ოპოზიციური პოლიტიკური გაერთიანების აკრძალვის მოთხოვნით მმართველი გუნდის სარჩელის განხილვა მიმდინარეობს.
„ეს პარტია პოლიტიკური საქმიანობის ლიცენზიებს იძლევა. შეუძლიათ, საკუთარი შეხედულებისა და დისკრეციის მიხედვით, ვიღაცაზე მოითხოვონ და აკრძალონ, ხოლო ვიღაცაზე არ მოითხოვონ და არ აკრძალონ!“ – განაცხადა გვარამიამ.
მისი თქმით, საკონსტიტუციო სასამართლოში წარდგენილი სარჩელის დაახლოებით 95%-ს პარლამენტის დროებითი საგამოძიებო კომისიის დასკვნა წარმოადგენს, რომელიც, გვარამიას შეფასებით, კონკრეტულ ფაქტებზე კი არა, ამ ფაქტების სუბიექტურ აღქმებზეა დაფუძნებული.
გვარამია მიიჩნევს, რომ სარჩელის მიზანი მხოლოდ კონკრეტული ოპოზიციური პარტიების აკრძალვა არ არის და ის მომავალში სხვა პოლიტიკური ძალებისა თუ ცალკეული პოლიტიკოსების წინააღმდეგაც შეიძლება გამოიყენონ.
„უნდათ, რომ გაუქმდეს ყველა პარტია და ინდივიდუალურად ყველა პოლიტიკოსი, ვისაც თვითონ გადაწყვეტენ. უკვე არააკრძალულებს და პოლიტიკური ლიცენზიის მიღებულებს კი, შემთხვევით თუ ივანიშვილს გააკრიტიკებენ, ამის შემდეგ აკრძალავენ“, – განაცხადა მან.
გვარამიას შეფასებით, ამგვარი მიდგომა ხელისუფლებას პოლიტიკური სივრცის საკუთარი ინტერესების შესაბამისად ჩამოყალიბების შესაძლებლობას მისცემს.
„ეს არის პოლიტიკური ლანდშაფტის შექმნა ერთპიროვნულად, არაბუნებრივად და მისი კონსტრუირება ისე, როგორც ეს ვიღაცას უნდა – როგორც ცნობილ სიმღერაშია, „რაც მამას უნდა“, – აღნიშნა გვარამიამ.
საკონსტიტუციო სასამართლოში მიმდინარე საქმე პარლამენტის 88 დეპუტატის მიერ წარდგენილ სარჩელს ეხება. მისი ავტორები ხუთი პოლიტიკური გაერთიანების არაკონსტიტუციურად ცნობასა და მათთვის პოლიტიკური საქმიანობის აკრძალვას ითხოვენ.
სარჩელი ეხება „ერთიანობა – ნაციონალურ მოძრაობას“, „კოალიცია ცვლილებისთვის – გვარამია, მელია, გირჩი, დროას“, „ძლიერ საქართველოს – ლელო, ხალხისთვის, თავისუფლებისთვის!“, „ფედერალისტურ პარტიასა“ და პარტიას „გახარია საქართველოსთვის“.
სარჩელის ავტორები ამტკიცებენ, რომ აღნიშნული პოლიტიკური გაერთიანებები 2016 წლიდან სისტემატურად უარყოფენ მოქმედი ხელისუფლებისა და მმართველი პარტიის პოლიტიკურ ლეგიტიმაციას. მათივე მტკიცებით, ამ პარტიების საქმიანობა მიმართულია საქართველოს კონსტიტუციური წყობილების ძალადობრივი შეცვლის, დამოუკიდებლობის ხელყოფისა და ტერიტორიული მთლიანობის დარღვევისკენ.
ოპოზიციური პარტიების წარმომადგენლები სარჩელში გამოთქმულ ბრალდებებს არ ეთანხმებიან.
საქმეს საკონსტიტუციო სასამართლოს შვიდი მოსამართლისგან შემდგარი პლენუმი განიხილავს.
