ვაშინგტონში, ლინკოლნის მემორიალში საინაუგურაციო პროგრამა „მოზეიმე ამერიკა" დაიწყო. ღონისძიებაზე სიტყვით გამოსვლისას აშშ-ის პრეზიდენტმა, ჯო ბაიდენმა დემოკრატიის მნიშვნელობაზე ისაუბრა და ამერიკელ ხალხს ერთიანობისკენ მოუწოდა.
„როგორც დღეს უკვე გითხარი, მე კიდევ ერთხელ ვისწავლე, რომ დემოკრატია ძვირფასია და სწორედ თქვენს გამო, დემოკრატიამ გაიმარჯვა. სწორედ ამიტომ ჯილსა და მე, კამალასა და დუგს გვსურს უზრუნველვყოთ, რომ ეს ინაუგურაცია არ გვეხება მხოლოდ ჩვენ, არამედ თქვენ ამერიკელ ხალხს. ეს დიდებული ერია. ჩვენ კარგი ხალხი ვართ და დავძლევთ ჩვენ წინაშე არსებულ გამოწვევებს, რომელიც ყველაზე რთულ რამეს მოითხოვს დემოკრატიისთვის - ერთობას. ეს მოითხოვს გაერთიანებას საერთო სიყვარულისთვის, რომელიც ჩვენ როგორც ამერიკელებს განგვსაზღვრავს", - განაცხადა ბაიდენმა.
90-წუთიანი პროგრამის განმავლობაში სიტყვით წარდგება კამალა ჰარისიც. ღონისძიებას მსახიობი ტომ ჰენკსი მასპინძლობს. მასში ასევე მონაწილეობას იღებენ ჯონ ლეჯენდი, დემი ლოვატო, ჯასტინ თიმბერლეიქი . მოგვიანებით, ჯო და ჯილ ბაიდენები თეთრი სახლის ლურჯი ოთახის აივანზე გამოჩნდებიან.
