ევროკავშირის საგარეო საქმეთა და თავდაცვის მინისტრების მიერ დამტკიცებული თავდაცვისა და უსაფრთხოების პოლიტიკის განმსაზღვრელი დოკუმენტის, „სტრატეგიული კომპასის“ თანახმად, ევროკავშირს ეყოლება სწრაფი რეაგირების ძალები. როგორც ევროკავშირის საბჭოს გვერდზე გამოქვეყნებულ დოკუმენტშია აღნიშნული, ევროკავშირს სხვადასხვა სახის კრიზისებზე რეაგირებისთვის შეეძლება ხუთი ათასამდე ჯარისკაცის სწრაფი მობილიზება.
დოკუმენტის მიხედვით, ევროკავშირის სამხედრო დანაყოფი სრულად იქნება ქმედით უნარიანი 2025 წლისთვის.
ამას გარდა, დოკუმენტის მიხედვით, 2023 წლიდან ევროკავშირი ჩაატარებს რეგულარულ სამხედრო წვრთნებს როგორც ზღვაში, ისე ხმელეთზე.
„ევროკავშირმა ახლახანს დაამტკიცა „სტრატეგიული კომპასი“. ის ევროკავშირს აძლევს აუცილებელი ინსტრუმენტების ნაკრებს, რათა ის გახდეს თავდაცვისა და უსაფრთხოების სფეროში ნამდვილი გეოპოლიტიკური მოთამაშე ნატო-სთან ერთად. ეს მხოლოდ მოგზაურობის დასაწყისია. ბევრი იქნება დამოკიდებული იმაზე, თუ რამდენად წარმატებით დავუჭერთ მხარს უკრაინას რუსეთის აგრესიის წინააღმდეგ“, – წერს ლატვიის საგარეო საქმეთა მინისტრი ედგარს რინკევიჩსი სოციალურ ქსელ „ტვიტერში“.
