საქართველო კატეგორიულად გმობს უკრაინის წინააღმდეგ რუსეთის წინასწარ დაგეგმილ აგრესიას, რაც უხეშად არღვევს საერთაშორისო სამართლის ნორმებს და დარტყმის ქვეშ აყენებს საერთაშორისო წესრიგს და ევროპული უსაფრთხოების არქიტექტურას, - ამის შესახებ საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა ეუთო-ს მოქმედი თავმჯდომარის, პოლონეთის რესპუბლიკის საგარეო საქმეთა მინისტრის, ზბიგნევ რაუსთან შეხვედრის შემდეგ გამართულ ბრიფინგზე განაცხადა.
ზალკალიანის განცხადებით, საქართველო მხარს უჭერს უკრაინის სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში, რისი დასტურიცაა საქართველოს პოზიციონირება უკლებლივ ყველა საერთაშორისო ფორმატში, მათ შორის ეუთო-ს ფარგლებში, სადაც საქართველო განუხრელად უერთდება უკრაინასთან მიმართებაში საერთაშორისო საზოგადოების კოორდინირებულ და კონსოლიდირებულ პოზიციას.
როგორც ზალკალიანმა ხაზგასმით აღნიშნა, საქართველო მხარს უჭერს უკრაინაში ეუთო-ს სპეციალური მონიტორინგის მისიის მანდატის გახანგრძლივებას და აფასებს მისიის საქმიანობაში ეუთო-ს თავმჯდომარეობის წვლილს.
მისი თქმით, მნიშვნელოვანია აღინიშნოს, რომ ხსენებულ მისიაში საქართველოდან 30-ზე მეტი დამკვირვებელი მონაწილეობდა.
საგარეო საქმეთა მინისტრმა პოლონურ მხარეს საერთაშორისო პერსონალის, მათ შორის, ქართველი დამკვირვებლების უსაფრთხო ევაკუაციისთვის მადლობა გადაუხადა. როგორც ზალკალიანმა განაცხადა, საქართველო და უკრაინა დღეს საერთო გამოწვევების წინაშე დგანან და საქართველო იყოს პირველი, რომლის წინააღმდეგაც 2008 წელს აგრესია განხორციელდა.
„ჩვენ მზად ვართ ხელი შევუწყოთ პოლონეთს, როგორც ეუთოს მოქმედ თავმჯდომარეს არსებული კონფლიქტების მშვიდობიანი მოგვარების საქმეში", - განაცხადა ზალკალიანმა.
