საერთაშორისო საზოგადოებამ, ჩვენმა მოქალაქეებმა ზუსტად იციან ის ქმედებები, რომელსაც საქართველო რუსული აგრესიის შესაჩერებლად ახორციელებს. დაზვერვის განცხადება სამწუხაროდ იმ სულისკვეთებას იმეორებდა, რასაც თუნდაც ხატია დეკანოიძე უკრაინულ არხებზე კომენტარების დროს აკეთებდა, - ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.
საუბარია უკრაინის თავდაცვის სამინისტროს დაზვერვის სამსახურის განცხადებაზე, რომლის მიხედვითაც, „საერთაშორისო სანქციების დაწესების გამო, რუსეთის ფედერაცია მოკლებულია სამხედრო, ორმაგი დანიშნულებისა და სამოქალაქო საქონლის მიწოდების შესაძლებლობას. სანქციების გვერდის ავლის მიზნით, რუსი აგენტები აყალიბებენ კონტრაბანდის არხებს, რომლებიც გადის კერძოდ საქართველოს ტერიტორიაზე. ამასთან, ქართული სპეცსამსახურების წარმომადგენლებმა მიიღეს მითითებები პოლიტიკური ხელმძღვანელობისგან, არ ჩარეულიყვნენ კონტრაბანდისტების საქმიანობაში".
რატი იონათამიშვილის განცხადებით, უკრაინის დაზვერვის მიერ გავრცელებული ინფორმაცია მტრულია არა მხოლოდ „ქართული ოცნების", არამედ საქართველოს სახელმწიფოს მიმართ.
„გუშინ ერთმანეთის პარალელურად გამომრიცხავი განცხადებები მოვისმინეთ. ერთი ამერიკის სახელმწიფო დეპარტამენტის განცხადება, სადაც საქართველოს მუშაობა რუსული აგრესიის შესაჩერებლად საერთაშორისო დონეზე მაღალი შეფასებით გამოირჩა. ასევე აღინიშნა, რომ ჩვენი ქმედებები საერთაშორისო პარტნიორებთან არის კოორდინირებული. მეორე მხრივ, ჩვენ მოვისმინეთ უკრაინული დაზვერვის ე.წ. განცხადება, რომელიც ცილისმწამებლურია და მძიმე პროვოკაციას წარმოადგენს. ეს ნამდვილად არამეგობრული და ბინძური პროვოკაცია იყო. საერთაშორისო საზოგადოებამ, ჩვენმა მოქალაქეებმა ზუსტად იციან ის ქმედებები, რომელსაც საქართველო რუსული აგრესიის შესაჩერებლად ახორციელებს. დაზვერვის განცხადება სამწუხაროდ იმ სულისკვეთებას იმეორებდა, რასაც თუნდაც ხატია დეკანოიძე უკრაინულ არხებზე კომენტარების დროს აკეთებდა. ეს განცხადება მტრულია არა მხოლოდ „ქართული ოცნების", არამედ საქართველოს სახელმწიფოს მიმართ. ის გარემოება და ფაქტი, რომ ის ადამიანები, ვინც საქართველოში უმძიმეს დანაშაულში არიან ბრალდებული და მსჯავრდებული, მათ შორის ადამიანების წამებაში, სიცოცხლის მოსპობაში და სხვა უმძიმეს დანაშაულებში, თუნდაც სააკაშვილი, თუნდაც ადეიშვილი და თუნდაც სხვა პირები, რომლებიც უკრაინის მთავრობაში გარკვეულ თანამდებობებს იკავებენ, ეს ქმნის გარკვეულ პრობლემებს ამ საკითხთან დაკავშირებით. როდესაც ასეთი ადამიანები, ვინც გამოცდილია მაღალ თანამდებობაზე ყოფნის დროს და დანაშაულებრივ სისტემას ჰქმნიდნენ, ახლა უკრაინის ხელისუფლებაში გარკვეულ პოზიციებს იკავებენ, ეს ცხადია გარკვეულ რისკებს ქმნის იმათ დაკავშირებით, რომ დეზინფორმაცია და ჰიბრიდული ომი საქართველოს წინააღმდეგ გარკვეული დოზებით იქნებ. ვინაიდან ეს ადამიანები სინამდვილეში ქართულ სახელმწიფოს ებრძვიან და არ კონკრეტულად „ქართულ ოცნებას", - განაცხადა იონათამიშვილმა.
