"ქართული ოცნება" მმართველი პარტიაა და, რა თქმა უნდა, პირველი ნაბიჯი მან უნდა გადადგას. ეს შეიძლება ნიკა მელიასა და გიორგი რურუას გათავისუფლება იყოს. ამის შემდეგ ოპოზიცია უნდა დათანხმდეს რაღაცას და ასე უნდა გადაიდგას პირველი ნაბიჯები," - აცხადებს „ამერიკის ხმისთვის" მიცემულ ინტერვიუში "ეროვნული დემოკრატიული ინსტიტუტის" ყოფილი დირექტორი საქართველოში ლორა თორნტონი.
მისი აზრით, ვითარება ისე გამოიყურება, რომ მოლაპარაკებები არ მუშაობს.
„შეიძლება, ეს მეთოდიც ჩავარდეს და განსაკუთრებით მმართველმა პარტიამ თქვას, რომ არ აღელვებთ ევროკავშირის მუქარა ფინანსური დახმარების შეჩერებაზე. არ ვისურვებდი, რომ საქმე ამ წკეპლებამდე მივიდეს და ევროკავშირმა და ამერიკამ დახმარების შეწყვეტა დაიწყონ. მაგრამ მათ ამის საშუალება ნამდვილად აქვთ. მე იმ ძირეული ცვლილებების განხორციელებაში დავხარჯავდი დროსა და ძალისხმევას, რომლებიც ინსტიტუტების გარდაქმნას სჭირდება, არჩევნებს კი გეგმიურად ჩავატარებდი.
"ქართულ ოცნებას" ძალიან უნდა, რომ ოპოზიცია პარლამენტში შევიდეს. ამიტომ, მთავრობა პირველი უნდა იყოს, რომელიც ნაბიჯს გადადგამს, იქნება ეს პატიმრების გათავისუფლება, გენერალური პროკურორის დანიშვნა თუ ცესკოს თავმჯდომარის 2/3-ით დანიშვნა. მთავრობამ რაღაც უნდა გააკეთოს იმის სანაცვლოდ, რომ ოპოზიცია პარლამენტში დაბრუნდეს", - აცხადებს თორნტონი და დასძენს, რომ აშშ-ს და ევროკავშირს ჯერ კიდევ აქვთ ზეწოლის ბერკეტები, მათ შორის, ფინანსური სანქციების სახით.
