„20 ივნისის ამნისტიის კანონი პერსონიფიცირებული ვერ იქნება", -ამის შესახებ „ქართული ოცნების" დეპუტატი, მიხეილ სარჯველაძე აცხადებს.
მისი თქმით, ამნისტიის დროს არ შეიძლება ვისაუბროთ იმაზე, თუ ვისი დანაშაული როგორი სიმძიმისაა.
„არ შეიძლება ვისაუბროთ იმის შესახებ, ვისი დანაშაული როგორი სიმძიმისაა. მნიშვნელოვანია, რომ პოლიტიკურ შეთანხმებას ხელი მოეწერა და მის შინაარსს უნდა მივსდიოთ. ამ შემთხვევაში, მეორეხარისხოვანია ის შეხედულებები და შეფასებები, რაც ინდივიდუალურად რომელიმე მხარეს შეიძლება ჰქონდეს. როდესაც ამნისტიის აქტზე ვსაუბრობთ, ის არ შეიძლება პერსონიფიცირებული და ინდივიდუალიზებული იყოს. არსებობს კონკრეტული კრიტერიუმები, რომელსაც ამნისტია უნდა აკმაყოფილებდეს. მისი მხარდაჭერა მოგვიწევს ერთად, როგორც ხელისუფლებას, ისე ოპოზიციას", - განაცხადა სარჯველაძემ.
შეგახსენებთ, 19 აპრილის შეთანხმების დოკუმენტის თანახმად, ნიკა მელიას გათავისუფლების მექანიზმი უნდა მოიძებნოს. რადგანაც ნიკა მელია კატეგორიულ უარს აცხადებს გირაოს გადახდის ნებისმიერ ფორმაზე, ამ დროისათვის მისი პატიმრობიდან გათავისუფლების მიზნით 20 ივნისის მოვლენების ამნისტია განიხილება, რაც მიუღებელია როფგორც საზოგადოების ერთი ნაწილის, ასევე „ნაციონალური მოძრაობისათვის". აღსანიშნავია, რომ სახალხო დამცველმა პროკურატურის მიერ საქმის შეწყვეტის ინიციატივა გააჟღერა.
