მოძრაობა "რიონის ხეობის გადარჩენისთვის" ორგანიზატორები აცხადებენ, რომ ხელისუფლებისგან კონკრეტულ პასუხს პარასკევამდე ელოდებიან.
რიონის ხეობის მცველი, ვარლამ გოლეთიანი აცხადებს, რომ დღეს, 21 აპრილს პირადად დაუკავშირდა გუბერნატორი, ზვიად შალამბერიძე რომელმაც თქვა, რომ ამ დრომდე პრემიერთან მათი მოთხოვნების განხილვა ვერ მოახერხეს, რადგან ის ჯერ იზოლაციაში, შემდეგ კი მიშელთან შეხვედრაზე იყო.
რიონის ხეობის მცველები ხელისუფლებისგან ითხოვენ იმ სამი პირობის შესრულებას, რომელიც მათ დიალოგის გაგრძელების წინაპირობად დააყენეს, ესენია ჰესის მშენებლობის მოსამზადებელი სამუშაოების შეწყვეტა, ხელშეკრულების გაუქმება და პროტესტის მონაწილეებისთვის ნამახვანისკენ თავისუფალი გადაადგილების საშუალების მიცემა.
ხელისუფლებამ გაწელა დრო შეგნებულად, შემდეგ გამოიყენა კოვიდის ფაქტორი და ჩაკეტა თავისუფლად პროტესტის ჩატარების შესაძლებლობა.
,,მათ თქვეს, რომ დღესვე მოხდება განხილვა პრემიერთან ამ საკითხის და მათგან პასუხი პარასკევს არცერთ შემთხვევაში არ გადაცილდება. ჩვენ რა თქმა უნდა, დაველოდებით პარასკევს. თუ პირობები არ დაკმაყოფილდება, ჩვენ დიალოგის გაგრძელების შესაძლებლობას ვეღარ ვხედავთ. ამ ნაწილში ველოდებით პასუხს ასრულებენ პირობებს იმისთვის, რომ დიალოგი გაგრძელდეს თუ არა", - განაცხადა ვარლამ გოლეთიანმა.
