ქობულეთის სოფელ ლეღვაში, ჩეხედანას უბანში 29-წლის კაცს, მეზობელმა ნაჯახით მრავლობითი ჭრილობა მიაყენა. დაშავებული, ქობულეთის “ევექსის” ჰოსპიტალშია მოთავსებული. ჩაუტარდა ოპერაცია-მის სიცოცხლეს საფრთხე არ ემუქრება.
„ნეიშენ ჯორჯია“-ს ოჯახის ახლობელი უყვება, რომ 21 წლამდე ახალგაზრდა, რ.გ.
თავს დაესხა 29 წლამდე მამაკაცს ნ.ხ-ს და მრავლობითი ჭრილობა ნაჯახით მიაყენა.
„ეს ბიჭი ჩვენი მეზობლის შვილიშვილია, ღამის საათები იყო, ყველას გვეძინა როცა ამბავი მოხდა. მოუპარია ნაჯახი სახლიდან, იმ სახლამდე სადაც დაზარალებული ცხოვრობს 4 სახლის გავლა უწევს, მაგრამ ვერავინ შევამჩნიეთ ისე მივიდა, იმიტომ რომ ღამის საათები იყო. მძინარეს შეუვარდა და ჭრილობები ფეხზე ნაჯახით მიაყენა“,-განაცხადა ოჯახის ახლობელმა
შევეცადეთ, ეჭვმიტანილის ოჯახს დავკავშირებოდით, თუმცა ჩვენ სატელეფონო ზარებს არ უპასუხეს.
როგორც ეჭვმიტანილის ოჯახის ახლობელი „ნეიშენ ჯორჯია“ -თან ყვება, რ.გ. ოჯახი საზღვარგარეთ სამუშაოდაა წასული, ხოლო ეჭვმიტანილი ამჟამად დედის ოჯახში ბებიასთან ცხოვრობდა.
„ოჯახი პოლონეთში სამუშაოდაა წასული, ბავშვი ლეღვაში, ბებიასთან ყავდათ დატოვებული.“-განაცხადა ოჯახის ახლობელმა.
რაც შეეხება დაჭრის მიზეზს, როგორც ოჯახის ახლობელი საუბარში აღნიშნავს,
ეჭვმიტანილმა ერთ-ერთ მიზეზად ბულინგი დაასახელა.
„როგორც ბავშვი ყვება, ეს ბიჭი მუდამ აბულინგებდა და ამიტომ გადაწყვიტა, მისი დაშინების მიზნით ეს საშინელება გაეკეთებინა. როგორც ამბობს ჭკუა ესწავლებინა. რა თქმა უნდა, ამ ყველაფერს ნანობს, რადგან აფექტურ მდგოამარობაში იყო. არ ვიცი რა მოხდება. მთავარია, რომ დაზარელებულის სიცოცხლეს საფრთხე არ ემუქრება.“,-განაცხადა ოჯახის ახლობელმა.
ცნობისთვის, ეჭვმიტანილი უკვე დაკავებულია, შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის, 117-ე მუხლით მიმდინარეობს რაც ჯანმრთელობის განძრახ, მძიმე დაზიანებას გულისხმობს.
ავტორი: ალექსანდრე გაბუნია
