რუსეთის მიერ მარიუპოლში საზღვაო სადესანტო ოპერაციისთვის შესაძლო მზადების შესახებ ინფორმაცია მოწმდება.
„ბოლო 24 საათის განმავლობაში მტერი ახორციელებდა საჰაერო დარტყმებს მარიუპოლზე, იყო თავდასხმები საზღვაო პორტზე. ჩვენ ასევე ვამოწმებთ ინფორმაციას მტრის საზღვაო დესანტისთვის მზადების შესახებ... მარიუპოლი მედგრად დგას, შეიარაღებული ძალები მტკიცედ იცავს მას. მნიშვნელოვანია მარიუპოლის როლის გაცნობიერება ახლა, რადგან, ფაქტობრივად, ის არის ფარი, რომელიც იცავს უკრაინას. მთელი რუსული ჯარი იქ არის თავმოყრილი, ისინი უფრო შორს არ მიდიან უკრაინის სხვა რეგიონებში", - განაცხადა უკრაინის თავდაცვის მინისტრის მოადგილემ ჰანა მალიარმა.
როგორც აღინიშნა, უკრაინის შეიარაღებულმა ძალებმა ბოლო დღის განმავლობაში დონეცკისა და ლუგანსკის მიმართულებით მტრის 10 შეტევა მოიგერიეს.
მინისტრის მოადგილემ ასევე აღნიშნა, რომ ხარკოვში სტაბილურად მძიმე ვითარებაა: ქალაქის ნაწილი გადაკეტილია, ქალაქზე მტრის იერიში მიმდინარეობს.
როგორც ცნობილია, მარიუპოლი ერთ-ერთ ყველაზე დიდ ჰუმანიტარულ კატასტროფას განიცდის რუსეთის აგრესიის გამო. აგრესორი ბომბავს უიარაღო მოსახლეობას და ბლოკავს ჰუმანიტარული დახმარების მიწოდებას.
მარიუპოლის მერმა ადრე განაცხადა, რომ რუსეთის შემოჭრის შემდეგ ქალაქში 20 000-მდე მშვიდობიანი მოქალაქე დაიღუპა.
უკრაინის თავდაცვის სამინისტროს დაზვერვის მთავარი დირექტორატის ცნობით, რუსებმა მარიუპოლში 13 მობილური კრემატორიუმი განალაგეს, რათა ქუჩებიდან დაღუპული მაცხოვრებლების ცხედრები ამოეღოთ.
დამპყრობლები მარიუპოლის მცხოვრებლებს უკრაინულ პასპორტებსაც ართმევენ და იძულებით გადაჰყავთ რუსეთში და დონეცკისა და ლუგანსკის ოლქების გარკვეულ რაიონებში.
დაახლოებით 120 000 მშვიდობიანი მოქალაქე იმყოფება ალყაში მოქცეულ მარიუპოლში.
აზოვის პოლკის, მოტომსროლელი ბრიგადის და საზღვაო ქვეითების ჯარისკაცები აგრძელებენ მარიუპოლის დაცვას.
