„საქართველოში საკმაოდ დიდი დეფიციტია ანტიგენბაზირებული ტესტების, სულ 25 ათასი გვაქვს დარჩენილი," - აცხადებს „ევროპული საქართველოს" მდივანი ჯანდაცვის საკითხებში, ვახტანგ კალოიანი.
კალოიანის თქმით, სისტემამ ინფიცირებული ადამიანების გამოვლენა მალე შესაძლოა, ვეღარ მოახერხოს.
„ჩვენთვის ცნობილი გახდა, რომ საქართველოში საკმაოდ დიდი დეფიციტია ანტიგენბაზირებული ტესტების, სულ 25 ათასი გვაქვს დარჩენილი. ჯანდაცვის სამინისტრო ითხოვს სწრაფი შესყიდვის წესით მის შემოტანას, რაც საკმაოდ სახიფათოა ამ გაზრდილი რაოდენობის გათვალისწინებით. 25 ათასი სულ რამდენიმე დღის საჭირო დოზაა. მსგავსი დეფიციტების შექმნა ძალიან სახიფათოა და მიუთითებს პროცესის ძალიან ცუდ დაგეგმვაზე. მაშინ, როდესაც აპრილის ბოლოს და მაისის დასაწყისში რაოდენობის ზრდას ველოდებით, ამ ფონზე ტესტების დეფიციტი ძალიან დიდ საფრთხესთანაა დაკავშირებული. ჩვენ შეიძლება, აღმოვჩნდეთ იმ ვითარებაში, როდესაც ვერ მოვახერხებთ ინფიცირებული ადამიანების აღმოჩენას. ის კვლევა, რომელიც შიდსის და ინფექციურ სნეულებათა ცენტრმა გამოაქვეყნა, სადაც ჩვენი მოსახლეობის მესამედი არ არის იდენტიფიცირებული, ზუსტად მსგავსი არასწორი დაგეგმვის შედეგია. ჩავარდნილი ვაქცინაციის კამპანიის პირობებში, ტესტების დეფიციტი შეიძლება დრამატული აღმოჩნდეს. მოვუწოდებ ხელისუფლებას, რაც შეიძლება სწრაფად მოაგვაროს ეს პრობლემა. რაც მთავარია, სწორად დაგეგმოს ისე, რომ ყოველთვიურად არ მოგვიწიოს სწრაფი შესყიდვის წესით ამის შეძენა, რაც კორუფციულ რისკებს ზრდის", - განაცხადა კალოიანმა ბრიფინგზე.
