„აშშ-ს პრეზიდენტის, განცხადება სომეხთა გენოციდის აღიარების შესახებ აღმაშფოთებელია და თურქეთს მომდევნო თვეებში შესაბამისი პასუხი ექნება",- განაცხადა, თურქეთის პრეზიდენტის სპიკერმა იბრაჰიმ ქალინმა, ამერიკის პრეზიდენტის მიერ სომეხთა გენოციდის აღიარებასთან დაკავშირებით.
მისივე თქმით, ბაიდენის განცხადება უსაფუძვლოა.
„აშშ-ს პრეზიდენტის ეს განცხადება უსაფუძვლო ბრალდებებს ეყრდნობა და ძირს უთხრის თურქეთსა და სომხეთს შორის ურთიერთობების ნორმალიზაციის პროცესს. უახლოეს დღეებსა და თვეებში იქნება სხვადასხვა ფორმისა და სახის რეაგირება",- განაცხადა პრეზიდენტ ერდოღანის სპიკერმა და მრჩეველმა იბრაჰიმ ქალინმა.
ქალინმა არ დააკონკრეტა, შეზღუდავს თუ არა ანკარა აშშ-ს შესვლას თურქეთის საჰაერო ბაზა ინჯირლიკში, რომელიც გამოყენებულია სირიასა და ერაყში ისლამური სახელმწიფოს წინააღმდეგ ბრძოლის საერთაშორისო კოალიციის მხარდასაჭერად.
მას შემდეგ, რაც თურქეთის სხვა ოფიციალურმა პირებმა სწრაფად დაგმეს ბაიდენის განცხადება, გადაწყდა, რომ ერდოღანი საკითხს განიხილავს ორშაბათს კაბინეტის სხდომის შემდეგ.
„თურქეთს აშშ-ს პრეზიდენტის ამ განცხადებაზე შესაბამისი პასუხი ექნება მაშინ, როდესაც ეს საჭირო იქნება", - აღნიშნა, ქალინმა.
ოფიციალური თურქეთი აცხადებს, რომ ოსმალეთში მცხოვრები მრავალი სომეხი მოკლეს პირველ მსოფლიო ომში ოსმალეთის ძალებთან შეტაკების დროს, მაგრამ უარყოფს, რომ მკვლელობები სისტემატიურად იყო ორგანიზებული და გენოციდს წარმოადგენს.
