„ამნისტიის კანონი უნდა შეეხოს, როგორც იმ პირებს, ვის მიმართაც კონკრეტული მუხლებით გამოძიება უკვე დაწყებულია, ასევე იმათ, ვის მიმართაც საქმის წარმოება შეიძლება მომავალში დაიწყოს", - ამის შესახებ „ქართული ოცნების" თავმჯდომარე ირაკლი კობახიძე აცხადებს.
მისივე განმარტებით, ამნისტიის კანონის მიღებით არ უნდა დაირღვეს თანასწორობის პრინციპი.
„უნდა დაკონკრეტდეს ერთი რამ - არის გარკვეული მუხლები, რასაც არ შეიძლება შეეხოს ამნისტია, ეს არის კონვენციის მე-2 - მე-3 მუხლებით დაცული უფლებები: სხეულის განზრახ მძიმე დაზიანება, წამება და არაადამიანური მოპყრობა
უნდა მივიღოთ გამართული კანონი. თანასწორობის პრინციპი უნდა იყოს დაცული. უმარტივესი პრინციპია. თუ გამოიცემა ამნისტიის კანონი, ის უნდა შეეხოს იმ პირებს, რომლებზეც უკვე აღიძრა საქმე და იმ პირებსაც, რომლებზეც შეიძლება აღსაძრავი იყოს საქმე. წინააღმდეგ შემთხვევაში ირღვევა თანასწორობის პრინციპი. ეს არის იურისპრუდენცია და არა პოლიტიკა". - თქვა კობახიძემ.
შეგახსენებთ, დღეს 6-თვიანი ბოიკოტის შემდეგ ოპოზიცია პარლამენტში შევიდა, რასაც წინ უსწრებდა 19 აპრილს შარლ მიშელის მიერ შემოთავაზებულ დოკუმენტზე ხელმოწერა. შეთანხნმების დოკუმენტის ერთ-ერთი პუნქტის თანახმად, 20 ივნისის საკითხზე ამნისტიის მიღება უნდა მოხდეს.
აღსანიშნავია, რომ 20 ივნისის საქმეების ამნისტირება მიუღებელია ანტისაოკუპაციო აქციის დაშლისას დაშავებული დემონსტრანტებისა და სამოქალაქო აქტივისტებისათვის. მათ ამის შესახებ ევროპული საბჭოს პრეზიდენტს, შარლ მიშელს წერილითაც კი მიმართეს. სამოქალაქო აქტივისტები ამ მოთხოვნით პარლამენტთან აქციებს მართავენ. ამნისტიის მიღების თავიდან ასარიდებლად „ნაციონალური მოძრაობის" დაკავებულმა თავმჯდომარემ ნიკა მელიამ თანხმობა განაცხადა, ევროპარლამენტარების მიერ შემოთავაზებულ გირაოს საფასურის გადახდაზე.
