„შევასრულე ჩემი სიტყვა და ხელი მოვაწერე შეწყალების აქტს!", - ამის შესახებ სქართველოს პრეზიდენტმა სალომე ზურაბიშვილმა განაცხადა.
პრეზიდენტმა გიორგი რურუას შეწყალების აქტზე ხელისმოწერის შესახებ განცხადება სოციალური ქსელში გააკეთა.
„მივესალმები შეთანხმების პირველი ეტაპის შესრულებას! ჩემი მხრივ შევასრულე ჩემი სიტყვა და ხელი მოვაწერე შეწყალების აქტს!
ვულოცავ კახა კუჭავას პარლამენტის თავმჯდომარედ არჩევას! ვულოცავ ყველა დეპუტატს, ვინც დღეს პირველად გამოიყენა ხალხის მიერ მინიჭებული მანდატი და შევიდა პარლამენტში! ყველას გისურვებთ წარმატებას!", - წერს პრეზიდენტი.
შეგახსენებთ, შარლ მიშელის დოკუმენტის შესაბამისად, დღეს შეთანხმების დოკუმენტზე ხელმომწერი ოპოზიცია პარლამენტში შევიდა, ეს წარმოადგენდა პრეზიდენტის მიერ დათქმულ ერთ-ერთ პირობას, რის შემდეგაც ის გიორგი რურუას შეწყალების აქტს გამოცემდა.
გიორგი რურუა 2019 წლის 19 ნოემბერს დააკავეს, მას სასამართლომ იარაღის უკანონო შეძენა-შენახვა-ტარების ბრალდებით 4 წლით პატიმრობა შეუფარდა.
