ხვალ, 6 მაისს, საქართველოში „ასტრაზენეკას" 43 ათასი დოზა შემოვა.
როგორც დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი ამირან გამყრელიძე განმარტავს, შემოსული დოზა განკუთვნილი იქნება იმ ადამიანებისთვის, ვინც „ასტრაზენეკას" ვაქცინის პირველი დოზა უკვე გაიკეთა.
გამყრელიძის განცხადებით, „ასტრაზენეკას" ათვისების მხრივ პრობლემა არ შეიქმნება.
„6 მაისს, კიდევ შემოვა „ასტრაზენეკას" 43 ათასი დოზა, რომელიც განკუთვნილია იმ ადამიანებისთვის, ვინც პირველი დოზა გაიკეთა. „ასტრაზენეკას" ვაქცინით, დღევანდელი მონაცემებით, აცრილია 25 461 ადამიანი და ჯავშნი აქვს კიდევ 10 ათას ადამიანს, ამიტომ არ მგონია, რომ ჩვენ პრობლემა გვქონდეს „ასტრაზენეკას" ათვისებასთან დაკავშირებით", - განაცხადა გამყრელიძემ.
