„მედიაზე თავდასხმა, რასაკვირველია, დასაგმობია. ვგმობთ და ეს არის უპირობოდ დასაგმობი, მაგრამ უნდა ვთქვათ, რომ ეს შემთხვევა აუცილებლად საჭიროებს გამოძიებას და შესწავლას" , - აცხადებს ადამიანის უფლებათა კომიტეტის თავმჯდომარე მიხეილ სარჯველაძე გუშინ, 4 მაისს, დავით გარეჯში, ივერი მელაშვილსა და ტელეკომპანია „მთავარის" გადამღებ ჯგუფზე თავდასხმის კომენტირებისას.
„მედიაზე თავდასხმა რასაკვირველია, დასაგმობია, ვგმობთ და ეს არის უპირობოდ დასაგმობი, მაგრამ უნდა ვთქვათ, რომ ეს შემთხვევა აუცილებლად საჭიროებს გამოძიებას და შესწავლას იმისთვის, რომ არ არსებობდეს რაიმე მიზეზი არასწორი დასკვნებისთვის. არაფრის დიდებით არ არის დასაშვები არც თავდასხმა, არც - პროვოცირება, არც ერთი ქმედება, რომელიც მიმართულია კონფლიქტის გამოწვევისკენ. ჩვენ გვჭირდება მშვიდობა საზოგადოებაში. ფაქტია, რომ როცა ადამიანებს შორის კონფლიქტი ხდება, იქ შეიძლება იყოს პროვოკატორი, მოძალადე ნებისმიერი მიმართულებიდან. კონფლიქტი რთული ფენომენია და ამას სჭირდება კარგად შესწავლა.
სასულიერო პირის სტატუსი არ იძლევა უფლებას ამ კონკრეტულ შემთხვევაში, რომ ვინმეს ჰქონდეს ჯავშანი დაკითხვაზე დაბარებასთან დაკავშირებით. თუ საქმისათვის მნიშვნელოვან გარემოებებზე ინფორმაციას ფლობს, მათ შორის, სასულიერო პირი, ის ვალდებულია ამის თაობაზე მიაწოდოს ინფორმაცია საგამოძიებო ორგანოებს და ითანამშრომლოს. სასულიერო პირებს აქვთ კონსტიტუციით გარანტირებული ჯავშანი სხვა საკითხებზე, რომელიც უკავშირდება აღსარების საიდუმლოებას და ა.შ. ეს სხვა შემთხვევაა," - განაცხადა სარჯველაძემ.
