საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი ჯოზეფ ბორელი აცხადებს, რომ ღარიბაშვილთან შეხვედრისას ქვეყნის ევროკავშირის წევრობის განაცხადი განიხილა და საქართველოს რეფორმების დაჩქარებისკენ მოუწოდა.
ბორელის თქმით, ეს საქართველოსთვის შესაძლებლობის ფანჯარაა და ხელისუფლებამ უნდა დააჩქაროს რეფორმები, განსაკუთრებით მართლმსაჯულების სფეროში და თავი აარიდოს ყველანაირ პოლიტიკურ პოლარიზაციას.
ბორელი აცხადებს, რომ რეფორმების საკითხი უმთავრესია, რასაც ევროკომისია საქართველოს ევროკავშირში გაწევრიანების კითხვარზე შეფასების მომზადებისას განსაკუთრებულ ყურადღებას მიაქცევს.
„ასევე განვიხილეთ ევროკავშირის წევრობის მოთხოვნასთან დაკავშირებული პერსპექტივები და ის შეფასება, რასაც ევროკომისია მომდევნო კვირებში მოამზადებს. მასთან ერთად განვიხილე, რომ ესაა შესაძლებლობების ფანჯარა და ეს ის დროა, როცა რეფორმები უნდა დაჩქარდეს, და არიდებული იყოს ნებისმიერი ტიპის პოლიტიკური პოლარიზაცია. უნდა გაგრძელდეს რეფორმების განხორციელება, განსაკუთრებით სამართლის მიმართულებით, რადგან ევროკომისია საქართველოს განაცხადზე შეფასების მომზადებისას ამ საკითხებს გაითვალისწინებს.
ამიტომ ახლაა კარგი მომენტი, რომ დაჩქარდეს რეფორმები, სასამართლო რეფორმა ჩვენთვის უმთავრესია ყველა რეფორმას შორის. ევროკავშირი არის პოლიტიკური სისტემა, რომელიც კანონის უზენაესობაზე, დამოუკიდებელ სასამართლოზეა დაფუძნებული, რომელიც სრულადაა ანგარიშვალდებული და მას ენდობიან მოქალაქეები. ჩვენ ამას ყველა კანდიდატისგან მოვითხოვთ", - განაცხადა ჯოზეფ ბორელმა.
გარდა ამისა ბორელმა განაცხადა, რომ ღარიბაშვილთან მან რუსეთისთვის სანქციების დაწესებაზე და მისგან თავის არიდების პრევენციის გზებზე ისაუბრა. ევროკავშირის წარმომადგენელმა ასევე აღნიშნა, რომ დიალოგი დროებით ოკუპირებულ ტერიტორიებსაც შეეხებოდა. მისი თქმით, ევროკავშირი გმობს არალეგალურ რეფერენდუმს რომლის ჩატარებაც ცხინვალში იგეგმება და მხარს უჭერს საქართველოს ტერიტორიულ მთლიანობას.
