ლეგიონ „აზოვის“ დამფუძნებლის, ანდრეი ბილეცკის ინფორმაციით, უკრაინის შეიარაღებულმა ძალებმა მარიუპოლში მდებარე ფოლადის ქარხანა „აზოვსტალში“ გამაგრებულ სამხედროებს საჭირო დახმარების მიწოდების მიზნით ოპერაცია 5-ჯერ ჩაატარეს და მათი უმრავლესობა წარმატებული იყო. ამის შესახებ ბილეცკიმ უკრაინულ მედიასთან ინტერვიუში განაცხადა.
ბილეცკი ასევე ყვება რამდენიმე ეპიზოდზე, როდესაც უკრაინელმა სამხედრო მფრინავებმა ვერტმფრენებით, საკუთარი სიცოცხლეს საფრთხე შეუქმნეს და „აზოვსტალის“ ტერიტორიაზე მედიკამენტებისა და პირველადი დანიშნულების საგნების ჩატანა შეძლეს.
„თავიდან ყველაფერი კარგად იყო, თუმცა ბოლოს და ბოლოს გასაგებია, რომ მტერიც ვითარდება, უყურებს და ხედავს, რომ მარიუპოლში ჩადიან ვერტმფრენები. ამ მცდელობების დროს აუცილებელია უკრაინელი მფრინავების გმირობისა და პროფესიონალიზმის აღნიშვნა. ამერიკელებიც კი არასდროს შესულან ანტისარაკეტო სისტემების ძლიერი დაცვის შიგნით ასობით კილომეტრზე და თან მტრის ავიაგამანადგურებლების პატრულირების დროს. ასეთი ოპერაციები კაცობრიობის ისტორიას არ ახსოვს“, – განაცხადა ბილეცკიმ.
ლეგიონ „აზოვის“ დამფუძნებლის თქმით, ეს ოპერაციები უკრაინის თავდაცვის სამინისტროს დაზვერვის მთავარი სამმართველოს მიერ იყო დაგეგმილი. მისივე განცხადებით, ვერტმფრენებით მარიუპოლის ტერიტორიაზე 72 მებრძოლის ჩაყვანაც კი მოხერხდა, პოზიციების გასაძლიერებლად. ბოლო გაფრენის დროს კი ქალაქში ჩაიყვანეს ექიმები. მათ შორის ორი ქირურგი, ანესთეზიოლოგი და ექთანი.
ბილეცკი აღნიშნავს, რომ მფრინავების უმეტესობა აცნობიერებდა, რომ დიდი ალბათობით ის დაიღუპებოდა, თუმცა ისინი მაინც მიფრინავდნენ რუსები მიერ ალყაში მოქცეულ ქალაქში.
„მათ ისტორიაზე აუცილებელად გადაიღებენ ფილმებს“, – განაცხადა ბილეცკიმ.
