ქართული ოცნების თავმჯდომარე, ირაკლი კობახიძე ამბობს, რომ 26 მაისს პრეზიდენტის განცხადება სასამართლოსთან დაკავშირებით "სირცხვილია". მისივე თქმით, პრობლემაა, რომ პრეზიდენტმა არ იცის, რაზე უნდა ისაუბროს საზეიმო დღეს.
"რაც შეეხება სასამართლოსთან დაკავშირებულ განცხადება, მე მგონი, სირცხვილი სწორედ ეს განცხადება იყო, ამას ძალიან თამამად ვამბობ. ჯერ ერთი, 26 მაისს, საზეიმო დღეს როდესაც არ იცი, რაზე უნდა ისაუბრო, ეს არის ძალიან სერიოზული პრობლემა. ამაზე უნდა მივანიშნოთ, რა თქმა უნდა, საქართველოს პრეზიდენტს, იმისათვის რომ დავიცვათ პრეზიდენტის ინსტიტუტი", - თქვა კობახიძემ.
დამოუკიდებლობის დღის საზეიმო ღონისძიებაზე სიტყვით გამოსვლისას პრეზიდენტმა განაცხადა, რომ "სირცხვილია, რომ საქართველო სამართლის ისტორიას" სათანადოდ ვერ აგრძელებს. მან რამდენიმე მაგალითი მოიყვანა ქართული სამართლის ძეგლებიდან და თქვა, რომ "ქართული სამართლის ისტორია ბევრ ევროპულ ქვეყანას დაამშვენებდა".
გარდა ამისა, კობახიძე პრობლემას უწოდებს იმასაც, რომ პრეზიდენტი სასამართლო სისტემის წინააღმდეგ "უარგუმენტო კამპანიას" შეუერთდა.
"მე დარწმუნებული ვარ, რომ ამ არასწორი განცხადებით მან სცადა სასამართლო სისტემის, ინსტიტუტის რეპუტაციის დაზიანება, თუმცა სინამდვილეში დააზიანა პრეზიდენტის ინსტიტუტი. ეს არის რეალობა. ჯერ კონტექსტი უნდა იცოდე, როდის რა განცხადება უნდა გააკეთო და მეორე შინაარსში... როდესაც ოპოზიცია აკეთებს არგუმენტების გარეშე განცხადებებს ერთია, მაგრამ როდესაც პრეზიდენტი აკეთებს არგუმენტების გარეშე განცხადებებს და თავს ესხმის სახელმწიფო ინსტიტუტს, ეს არის სერიოზული პრობლემა და არის სერიოზული გადახვევა იმ როლიდან, რომელიც აქვს პრეზიდენტს, როგორც ინსტიტუტების გარანტს", - თქვა კობახიძემ.
