აძლევენ თუ არა მედიკოსები ხელისუფლებას ლოკდაუნის ხელახლა გამოცხადების რეკომენდაციას? - ინფექციური საავადმყოფოს ბოქსირებული განყოფილების უფროსი მარინა ენდელაძე ქვეყანაში არსებული ეპიდსიტუაციის შეფასებიას ამბობს, რომ ვითარება საგანგაშო არ არის.
„ვირუსის გავრცელების მხრივ, ქვეყანაში სასურველი შედეგები არ ფიქსირდება, მაგრამ ეს მონაცემები საგანგაშო ნამდვილად არ არის. ეს მონაცემები მიანიშნებს, რომ ჩვენ ძალიან ფრთხილად და ყურადღებით უნდა ვიყოთ. იმ შემთხვევაში, თუ ძალიან გაიზრდება ინფიცირებულთა რაოდენობა, ყველას ძალიან გაგვიჭირდება, ამიტომ ყველა ადამიანს ვთხოვ, დაიცვას რეგულაციები... ამჟამად საქართველოში კარანტინი ვერ გამოცხადდება, რადგან ამას მართლა ვეღარ გავუძლებთ. ჩაკეტვას სჯობს, ჯარიმები გამკაცრდეს. იმ შემთხვევაში, თუ სხვა გამოსავალი აღარ იქნა და მოსახლეობის ძალიან დიდი ნაწილი კორონავირუსით დაინფიცირდა, მაშინ რეგულაციები უნდა გამკაცრდეს. ამ ეტაპზე კარანტინის გამოცხადების საკითხი დღის წესრიგში არ დგას. ახლა ჩვენი მოვალეობა არის ვირუსის შეკავება",- აცხადებს ენდელაძე, რომლის კომენტარსაც „პრაიმტაიმი" ავრცელებს.
