„ნიკა მელია „ქართული ოცნების" წინააღმდეგ", სინამდვილეში საქმის განხილვა თუ იქნება, იქნება „ნიკა მელია საქართველოს წინააღმდეგ," - განაცხადა დღეს, 12 მაისს, საპარლამენტო უმრავლესობის წევრმა, შალვა პაპუაშვილმა ევროსასამართლოს მიერ „ერთიანი ნაციონალური მოძრაობის" თავმჯდომარის ნიკა მელიას სარჩელის წარმოებაში მიღების კომენტირებისას.
ცნობისთვის: დღეს, 12 მაისს, ცნობილი გახდა, რომ სტრასბურგის ადამიანის უფლებათა სასამართლომ ნიკა მელიას სარჩელი წარმოებაში მიიღო.
„ნაციონალური მოძრაობის" თავჯდომარემ და მისმა ადვოკატებმა სასამართლოში სარჩელი 1 მარტს დაარეგისტრირეს, 21 აპრილს კი, სტრასბურგმა სარჩელი დააკომუნიცირა და საქართველოს მთავრობას ყველა ის შეკითხვა დაუსვა, რომელზეხ საჩივარშია საუბარი.
მისივე თქმით, ეს მელიასგან არის მცდელობა, რომ საერთაშორისო ინსტიტუტების გამოყენებით, თემა პიარულად აწიონ.
„ეს ყველაფერი ჩვენს თვალწინ მოხდა, ჩვენს თვალწინ მოიხსნა მან სამაჯური, ჩვენს თვალწინ თქვა, რომ არ ემორჩილება კანონს და მართლმსაჯულებას, ის არ გადაიხდიდა გირაოს და ვერ დაიჭერდნენ, ამ ყველაფერს კანონის შესაბამისი პასუხი მოჰყვა. შემდეგ გვესმოდა მისგან საუბარი, რომ გირაოს არ მიიღებდა და ყველა, ვინც გირაოს გადაიხდიდა, მისი მტერი იქნებოდა. საბოლოოდ, ვნახეთ როგორ დასრულდა ეს ყველაფერი. ის მართლმსაჯულებამ დააკავა, გირაოც გადაიხადეს, ამნისტიაც იქნება გამოცემული, ეს არის ახლა, უბრალოდ, მცდელობა, რომ საერთაშორისო ინსტიტუტების გამოყენებით პიარულად თემა აწიონ. გარწმუნებთ, რომ შინაარსობრივად რაიმე პრობლემა არ არის. ჩვენ ვნახეთ, როგორ არღვევდა კანონს ნიკა მელია",- განაცხადა პაპუაშვილმა.
პაპუაშვილის თქმით, ნიკა მელიამ დაწერა „ნიკა მელია „ქართული ოცნების" წინააღმდეგ, სინამდვილეში კი უნდა დაეწერა „მელია საქართველოს წინააღმდეგ".
„საერთო ჯამში, ესეც აჩვენებს, რამდენად არასერიოზულ მდგომარეობაში იყენებენ საკუთარ თავს ჩვენი ოპონენტები. ნიკა მელიამ რომ დაწერა, ეს საქმე არის „ნიკა მელია „ქართული ოცნების" წინააღმდეგ", სინამდვილეში, საქმის განხილვა თუ იქნება, იქნება „ნიკა მელია საქართველოს წინააღმდეგ". როგორც ჩანს, მას ამის თქმა ეთაკილება, რომ სწორედ საქართველოს წინააღმდეგ შეაქვს სარჩელი", - განაცხადა პაპუაშვილმა.
