ოპოზიციონერი დეპუტატი, „ლელოს“ წარმომადგენელი სალომე სამადაშვილი აცხადებს, რომ საპარლამენტო საქმიანობა მთლიანად უნდა იყოს აგებული ევროკავშირის 12-პუნქტიანი მოთხოვნების შესრულებაზე.
სამადაშვილის თქმით, კონსულტაციებს აწარმოებენ სხვა პარტიებთან, რათა შეიქმნას საგანგებო დღის წესრიგი პარლამენტისთვის.
„ნათელია, რომ საქართველოს პარლამენტში საქმიანობა ჩვეულებრივ რეჟიმში ვერ გაგრძელდება. საპარლამენტო საქმიანობა მთლიანად უნდა იყოს აგებული ასევე ევროკავშირის 12-პუნქტიანი მოთხოვნების შესრულებაზე, რადგან, წინააღმდეგ შემთხვევაში, პარლამენტის საქმიანობას დღეს ამ ქვეყანაში, შეიძლება ითქვას, რომ არანაირი აზრიც კი არ ექნება. ამიტომ ჩვენ დავიწყეთ კონსულტაციები და ვაგრძელებთ კონსულტაციებს სხვა პარტიებთან, რომლებიც წარმოდგენილნი არიან პარლამენტში იმისთვის, რომ შეიქმნას საგანგებო დღის წესრიგი პარლამენტისთვის და დაუყოვნებლივ დავიწყოთ იმ ინიციატივების გატარება პარლამენტში, რაც აუცილებელია, რათა ქვეყანამ მიიღოს კანდიდატის სტატუსი შემდეგ ჯერზე მაინც.
ეს არის სინქრონიზებული იმ პროცესთან, რაც გუშინ დაანონსდა, როდესაც შემოგვთავაზეს ეროვნული თანხმობის ხელისუფლების ფორმირება. მათაც ექნებათ შესაბამისი ნაბიჯები, საკანონმდებლო ინიციატივები განსახორციელებელი და ჩვენ შეგვიძლია, რომ დღესვე დავიწყოთ მომზადება იმ სამოქმედო გეგმის, რომელიც უკვე უნდა განხორციელდეს პარლამენტში. თუ „ქართული ოცნება“ არ აპირებს, რომ წამოვიდეს ამ დღის წესრიგით, მე შემიძლია, გითხრათ, რომ „ლელოს“ პოზიცია არის, რომ საქმიანობა ჩვეულებრივ რეჟიმში საქართველოს პარლამენტში ვერ გაგრძელდება, რადგანაც ეს დღეს უკვე ეწინააღმდეგება ჩვენს ეროვნულ ინტერესებს. თუმცა საბოლოო სამოქმედო გეგმა პარლამენტთან დაკავშირებით უნდა ჩამოყალიბდეს ერთობლივად, ყველა ოპოზიციური პარტიის მიერ“, – განაცხადა სალომე სამადაშვილმა.
