გარევაჭრობის აკრძალვის მიუხედავად, გორში, გურამიშვილის ქუჩაზე მოვაჭრეებმა რამდენიმე დახლი ისევ გაშალეს. მათ მხარდაჭერას უცხადებენ „გირჩი – მეტი თავისუფლების“ წარმომადგენლები, რომლებიც გარემოვაჭრეებთან იმყოფებიან. ადგილზე იმყოფებიან სამართალდამცველები და გორის მუნიციპალიტეტის მერიის კეთილმოწყობის სამსახურის თანამშრომლებიც. მოვაჭრეები ამბობენ, რომ არ დაემორჩილებიან აკრძალვას.
გორის მუნიციპალიტეტის მერიამ გარემოვაჭრეებს ალტერნატიული ფართი წმინდაწყლის ტერიტორიაზე, ახალ ბაზარში შესთავაზა, სადაც ისინი ერთი წლის განმავლობაში საქმიანობის გაგრძელებას სიმბოლურ ფასად შეძლებენ. თუმცა მერიის შეთავაზებას გარემოვაჭრეები არ თანხმდებიან. „გირჩი – მეტი თავისუფლების“ წარმომადგენლები მოვაჭრეების უფლებების დაცვას სასამართლოში შეეცდებიან.
„ეს არის ადამიანების ბრძოლა იმისთვის, რომ გადარჩნენ. ამ ხალხს მთავრობა იმისთვის არ აურჩევია, რომ დაიშალოს გადარჩენა. ისინი იძულებულები არიან, თავი გადაირჩინონ და ქუჩაში ამიტომ ივაჭრონ. მათ შესთავაზეს სხვა ფართი, მაგრამ ამ ადამიანებისთვის იქ ვაჭრობა არაა მომგებიანი, სხვადასხვა გარემოების გამო. ჩვენ ყველა გზებით შევეცდებით მაგათ დაცვას, მათ შორის სამართლებრივი გზებით, იქნება ეს სასამართლოს გზა; თუ იქნება საჭიროება, საკონსტიტუციო სასამართლოში გავასაჩივრებთ და იქ დავადგენთ, ეს ნორმა რამდენად არის კონსტიტუციური, რადგან გვგონია რომ ეს ხალხი არის ბოლომდე მართალი“, – აცხადებს „გირჩი – მეტი თავისუფლების“ წარმომადგენელი ბადრი გრიგალაშვილი.
ვაჭრობისთვის საჭირო კონსტრუქციებისგან ქუჩების გასუფთავების შესახებ მერიის ზედამხედველობის სამსახურის თანამშრომლებმა გარემოვაჭრეები ბოლოს სამი კვირის წინ, 14 ივნისს გააფრთხილეს და ტერიტორიის გასასუფთავებლად ერთი კვირის ვადა მისცეს. ორი დღის წინ კი, ქუჩები გაწმინდეს დახლებისგან, რასაც მოვაჭრეების პროტესტი მოჰყვა.
