პარტია „მოქალაეების“ ლიდერის ალეკო ელისაშვილის განცხადებით, ევროკავშირის რეკომენდაციების შესასრულებლად ოპოზიციის მიერ წარმოებული ალტერნატიული პროცესი არასერიოზულია და უპასუხისმგებლობაა.
მისივე თქმით, სახლობანას თამაშს თავი უნდა დაანებონ.
„ოპოზიციის მიერ წარმოებული ალტერნატიული პროცესი არის ძალიან არასერიოზული და უპასუხისმგებლობა. ეს ყველაფერი დამაზიანებელია ჩვენი ევროპული ინტეგრაციისთვის. ევროკომისიის რეკომენდაციაა, რომ ერთად დავსხდეთ და ვიმუშაოთ. რას ვხედავთ? – მაგასთან არ დავჯდებიო, მაგრამ იმავე შენობაში დაიწყეს ალტერნატიული ჯგუფების შექმნა. ეს რა არის? პარლამენტში მუშაობ, კომიტეტებში და სამუშაო ჯგუფში არა? სახელი არ მოსწონთ? სახლობანას უნდა მოეშვან. არავის ჭკუას არ ვარიგებ, მაგრამ თუ კანდიდატის სტატუსი გვინდა, მაშინ ამ ყვემაფერს ცოტა მეტი პასუხისმგებლობით უნდა მივეკიდოთ. სამუშაო ჯგუფებში იმიტომ უნდა დავსხდეთ, რომ „ქართულ ოცნებას“ რაიმე სათქმელი არ მივცეთ. ევროპული რეკომენდაციაა პოლარიზაციის შეწყვეტა და რომც არ მოგვიწოდონ, პარლამენტში, ერთ შენობაში ვართ და ვითომ, ერთად დასხდომა და ლაპარაკი არ გვინდა? – იქ ყავის და ჩაის დასალევად არავინ დადის, ამ სამუშაო პროცესს ნუ აიაფებენ.
რას აკეთებს ვაშაძე და რატომ აყოლილა „ლელო“, ვერ ვხვდები. ევროპული ინტეგრაციის გარდა, ამ პროცესს არაფერი მოაქვს. „ქართული ოცნება“ ოპოზიციის სიბრიყვეს ძალიან მოხერხებულად და უსინდისოდ იყენებს. ღრმა სიბრიყვე იყო, რომ შარლ მიშელის შეთანხმებას „ნაციონალურმა მოძრაობამ“ ხელი რომ არ მოაწერა სამი თვე, შემდეგ „ქართულმა ოცნებამ“ შარლ მიშელს რომ თავზე გადაახია და თქვეს, ხელს ახლა ვაწერთო, ეს მაინც ხომ გვაქვს გავლილი? როცა ვაშაძე ასეთ რამეს აკეთებს, „ქართული ოცნების“ წისქვილზე ასხამს წყალს, რადგან იმის თქმის საბაბს აძლევს, რომ თქვან, სამუშაო ჯგუფებში არ მოვიდნენო. ამას რატომ აკეთებენ? ან „ქართულ ოცნებას“ შეგნებულად ეხმარებიან და დავალება აქვთ, ან რა უნდათ?“, – განაცხადა ალეკო ელისაშვილმა ჟურნალისტებთან საუბრისას.
